Candidato pa secretario di estado pa D66 ta retira pa motibo di CV incorrecto

DEN HAAG – Parlamentario di D66 Nathalie van Berkel, cu su partido  a propone como staatssecretaris (secretario di estado) di Finanza, no lo drenta mas den e gabinete nobo. E la a decidi pa retira su candidature despues cu a sali na cla cu el a duna informacion incorrecto tocante e estudio cu el a sigui. E corant Volkskrant a reporta e caso awe mainta como prome. For di investigacion di e corant a resulta cu Van Berkel durante añanan tabatin un relato riba su CV cu no tabata corecto cu su pasado academico. Estudionan cu tabata menciona riba su CV na LinkedIn, el nunca a completa. Tambe el a studia riba un nivel mas abou cu el a indica. Den un declaracion, Van Berkel ta bisa cu “e discusion cu a surgi ta distrae di e tarea importante cu e gabinete tin dilanti di dje.” El ta enfatisa cu nunca no tabata su intencion pa presenta informacion incorrecto riba su CV.

CUMINSAMENTO FRESCO

Tambe e candidato pa prome minister Jetten a comunica e decision di Van Berkel na prensa na e lugar unda awe e la tene conbersacionnan cu proponi miembronan di gobierno. Jetten a papia di un “decision balente y corahe” di Van Berkel, cu segun e, a wordo tuma despues di un bon consulta hunto tocante e situacion. Segun Jetten, Van Berkel tabata habri cu D66 tocante no completa su estudio y el a menciona esey tambe den entrevista. “Pese di esey, nos ta mira awe cu esaki ta conduci na pregunta nobo y conmocion.” Segun e futuro prome minister, Van Berkel mes lo bai mas profundo riba esaki despues. Segun Jetten, e siman aki di conversacion cu tur candidato tambe ta enfoca riba pregunta si tur hende por haci un cuminsamento fresco, y Van Berkel a haci e evaluacion cu den su caso esaki no ta asina.