Carnaval drentando su ultimo fin di siman: Alegria grandi, pero tambe cu preocupacion

Carnaval drentando su ultimo fin di siman: Alegria grandi, pero tambe cu preocupacion

Posted on 02/13/2026 10:27 am AST | Updated on 02/13/2026 10:27 am AST

ORANJESTAD - Aruba ta drentando su ultimo fin di siman di carnaval. Un temporada cortico, yena cu alegria, color i orguyo cultural . Pero tambe e tabata yena cu reto logistico, momento di tension y algun incidente. E comunidad a mustra, den gran parti, un comportacion responsable durante e eventonan — primordialmente riba caminda — pero un aspecto a sobresali: e nivel di buracheria di automobilistanan despues di e eventonan.

UN LIMITE CU A WORDO PASA

Buracheria no ta algo nobo den carnaval. Ta parti di celebracion, di gozo i di libertad temporario. Pero e aña aki, hopi participante i esnan na banda a percibi cu e consumo di alcohol a pasa e limite normal. Aunke menos, na diferente punto riba caminda a mira situacionnan di persona claramente bou di influencia, cu no por controla nan mes, creando tension i, den algun caso, riesgo real pa seguridad. Detencion tabata minimal durante e paradanan mes. E detencionan mayor tabata pafo, y manera indica caba, cu automobilistanan. 

SEGURIDAD TA BIRA TEMA

Mas cu un celebracion cultural, carnaval tambe ta un espacio publico comparti. Pero, ora buracheria domina, e atmosfera por cambia. A nota tambe cu tabatin menos interes di algun hende pa bai wak carnaval, no pasobra nan no gusta carnaval, pero pasobra nan ta duda di nan seguridad. E miedo pa haya nan mes involucra den un incidente, bringamento of situacion fuera di control, ta un señal cu no mester wordo ignora.

ALEGRIA CU RESPONSABILIDAD

Esaki no ta un atake contra carnaval. Al contrario. Carnaval ta un simbolo di identidad, creatividad y union. Pero si nos kier mantene e tradicion fuerte y sostenible, tin cu tin un conversacion honesto tocante limite. Organisadornan, autoridadnan i mesun comunidad tin un rol. Control, concientisacion i aplicacion di regla no ta contra alegria — ta pa proteha e experiencia di tur hende.

UN REFLEXION PA FUTURO

Aruba a goza. E energia tabata presente. Pero si nos mira bek riba e temporada aki, e tema di buracheria ta uno cu mester atencion serio. No pa crea alarma, pero pa sigura cu carnaval ta keda un espacio di celebracion y no di preocupacion. E reto pa añanan binidero ta cla: con mantene e alegria, pero reduci e exceso? E respuesta lo depende di un esfuerzo colectivo.

  • Powered by SETAR