Tin interes creciente pa Starlink pa Aruba, pero su efecto por ta limita

ORANJESTAD – Na Aruba e interes pa uso di e servicio di internet remoto Starlink ta creciendo. E forma di opera, compara cu sistema satelital tradicional,ta hacie interesante pa hopi isla.  E ta traha diferente haciend’e un solucion efectivo pa area caminda no tin infrastructura di cable of fibra optico. Pero, segun director di SETAR, Roland Croes na Noticiacla, SETAR mes tin Aruba cubri totalmente pues e efecto pa uso remoto di internet ta casi nulo. Consecuentemente, e pensamento cu Starlink ta un bon reemplaso, no tey.

BONAIRE TIN STARLINK 

Sigur despues cu Bonaire recientemente a anuncia cu nan ta ofrece e servicio awor legalmente, y cu ayudo di gobierno hulandes, e tema a lanta cabez atrobe. Tin basta hende cu tin e servicio caba na, aunke e no ta un servicio ‘legal’ ainda. Esnan cu tine, a logra drenta Aruba cu ne, di un forma clandestino, y ta use, sin problema. Pero, mescos cu tur otro proveedor, e persona cu kier usa e sistema, mester di un permiso di Directie Telecomunicatie Zaken (DTZ).

COMPETENCIA PA SETAR?

Riba pregunta di moderador Tito Laclé na e director di Setar, Roland Croes, durante e programa Noticiacla LIVE, riba  e impacto cu Starlink por tin riba SETAR, e la bisa cu manera tur proveedor, Starlink tin su bentaha, pero e tin su desventaha tambe. “Y e tin su problema cu capacidad tambe. Mas hopi hende use mundialmente, mas slow e ta bira”, Croes a sigura. E ta bisa tambe cu e velocidad di Setar na Aruba, ta hopi mas halto cu esun cu Starlink ta ofrece. Y unabez cu Setar tin full Aruba conecta cu fiberoptics, no por compare mas pa loke ta calidad. 

BENEFICIO DI STARLINK 

E beneficio mas grandi segun Croes mes ta admiti, ta cu Starlink bo por move mihor rond cu ne. Cu esaki, e kier men, tin acceso na lugar remoto. Pero asina mes, Setar ta miho. “Si ta na Aruba bo kier move (cu internet:red), nos a zorg pa tur punto ta cubri” Croes a sigui bisa, splicando cu si bo ta busca Starlink, pasobra bo ta biba den un lugar remoto, bo no mester di Starlink pa esey pasobra Setar ta yega tur caminda. 

E LO BIN ARUBA?

Croes ta kere si, cu mescos cu tur otro isla, Aruba tambe lo haye, y esaki como un proveedor, esta cu un compania ta cuminsa ofrece ‘legalmente’na Aruba, y cu e lo bira un competencia pa Setar pa loke ta internet. Pero segun Croes, esey ta depende di gobierno, cu ta esun cu ta duna licensia. “A nos ta un di e partidonan di e mercado. Ta gobierno ta dicidi ki dia ta duna licensia” Croes a bisa. 

CON STARLINK TA FUNCIONA 

Starlink ta tanto un proveedor di servicio di internet (ISP) como e servicio mes. E sistema satelital aki ta wordo opera pa SpaceX, di e conocido homber mas rico di mundo Elon Musk. Starlink ta entrega internet di banda hancho cu velocidad halto i latencia abou directamente na usuariocanan, usando un gran constelacion di satelitenan den e orbita abou di planeta tera (Low Earth Orbit (LEO).