Van Rijn: No nombra ken cu ta pa bira Minister Plenipotenciario!

WILLEMSTAD – Mientras cu tanto Aruba y Corsou tin problema cu nan minister plenipotenciario (Aruba no a apunta uno mas, y esun di Corsou mester a retira), tabatin un discusion recientemente na Corsou unda cu un profesor a trata e tema aki. E funshon di Minister Plenipotensiario (‘Gevolmachtigde Minister’) ta unu sumamente importante den Reino, i na opinion di prof. Arjen van Rijn nos mester evitá ku ta nombra ken ku ta pa bai okupá e posishon ei den Kas di Kòrsou na Hulanda. Esei ta loke por a konkluí for di palabranan di prof. Van Rijn durante un presentashon ku el a duna na Parlamento di Kòrsou den kuadro di un konseho riba 70 aña Statüt. E punto di Minister Plenipotensiario tambe ta unu ku Raad van State a duna konseho riba dje den e kaso aki, i mester bisa ku e reakshonnan no tabata muchu plasentero, segun van Rijn.

Pero segun sr. Van Rijn, e tin komprenshon pa e posishon di Raad van State, pasobra si komo pais bo ke presentá algu den Konseho di Minister di Reino, bo mester tin un figura di peso ku ta hasi e trabou i para pa su pais. Tin di atmití ku esei no tabata e kaso tur ora den pasado. Den pasado tabatin ministernan plenipotensiario hopi bon, pero tabatin algun hopi malu tambe. E ministerio akí no mester ser mirá komo un algu insignifikante den e gabinete ora di formashon. Al kontrali, e mester ser konsiderá komo e punto di salida ora di formashon di un gobièrnu.

Ta importante pa nos tin un persona di peso ku por presta na nivel di tur e ministernan na Hulanda ku hopi biaha tin eksperensia kaba. Ta hendenan “baké” kaba manera nos ta bisa aki na Kòrsou, i bo no por manda un nobato bai sinta meimei di nan. Pues, ta importante pa nos tin un minister plenipotensiario di kalidat i ku por hasi e trabou. I aki na Kòrsou i otro paisnan den Karibe tin hopi dje personanan ei, i no tin problema pa haña nan. Esei ta un bon komienso, ku un bon representashon den Konseho di Minister di Reino.

VOTO PA 2DE KAMER

Den e konsehonan di Raad van State tin e sugerensia pa duna pueblonan den Karibe Hulandes e derecho di voto pa elekshon di 2de Kamer. Prof. Van Rijn a duna di konosé bon kla ku riba e punto akí e no ta di akuerdo, aunke e sa ku esei lo no bai sosodé tampoko. E no ta kere ku esei lo ta un bon idea, ademas polítika Hulandes lo no bai hasié tòg. Pues, lo por hinka hopi energia i trata di hasi algu via di Raad van State, pero finalmente polítika Hulandes lo no permitié.

Na di dos lugá, no ta e mihó manera pa ‘usa’ pueblonan den Karibe den elekshon di 2de Kamer. Por tin outonomia den Reino, pero mayoria di tarea ku Staten Generaal ta ehersé ta na bienestar di Hulandes mes. E paisnan Karibense solamente ta bini na remarke ora ta trata di asuntunan den Reino. Tin hopi kos ku nos por hasi via di 2de Kamer, ta e inisiativa mester ser tumá. NOTA: E articulo ta scirbi den papiamento fonetico di Corsou.