A prolonga detencion preventivo di pelotero professional Jonathan Schoop cu 60 dia

WILLEMSTAD – Detencion preventivo di beisbolista Jonathan Schoop a wordo prolonga cu sesenta dia. Asina un huez-comisario a dicidi. Na mes momento, detencion preventivo di tres otro sospechoso tambe a wordo prolonga cu e mesun termino. Detencion di un muhe cu tambe tabata deteni, a wordo suspende. Schoop a wordo deteni riba 29 di januari hunto cu ocho otro persona durante un operacion di polis. Durante e accion ey a wordo confisca varios arma di candela, municion, patronnan y magazinan. Investigacion den e caso ta sigui na marcha. Tocante sospechanan exacto y progreso adicional di investigacion penal, Ministerio Publico no a duna mas detaye.

NECESARIO

Prolongacion di detencion preventivo cu sesenta dia ta nifica cu huez-comisario ta haya necesario cu e sospechoso mester keda mas tempo deteni mientras investigacion penal ta continua. Esaki ta sosode solamente si Ministerio Publico por haci plausible cu tin obhecion serio contra sospechoso y cu tin motibo pa continua detencion, manera riesgo cu investigacion por wordo influencia, prueba por desparece of sospechosonan por coordina entre nan mes. Un prolongacion no ta bisa nada riba culpabilidad of inocencia. No ta un condena, sino un decision procesal pa permiti investigacion wordo completa. Den e periodo aki, husticia por sigui reuni prueba, tende sospechosonan y analisa resultado di investigacion. Despues di e sesenta dia, lo mester wordo evalua di nobo si detencion preventivo lo wordo prolonga, suspende of termina. Ministerio Publico por tambe dicidi pa trese e caso dilanti di huez of, si prueba no ta suficiente, laga sospechoso bai liber.