Sector di aviacion tin miedo pa fila largo pa control di pasaporte nobo EU

BRUSELAS - Sector di aeropuerto y linea aerea na Europa a zona alarma tocante e sistema nobo di control di entrada y salida di Schengen, e asina yamado Entry/Exit System (EES). Segun organisacionnan di industria ACI EUROPE, Airlines for Europe (A4E) y International Air Transport Association (IATA), e sistema ainda ta causa retraso considerable pa biaheronan for di Union Europeo (EU). Sin adaptacion directo, den e luna di zomer mas ocupa, tempu di espera por subi te cuatro ora of mas. Den un carta na eurocomisario Magnus Brunner (Asunto Interno y Migracion), e organisacionnan ta indica cu biaheronan awor ya ta warda te dos ora na control di frontera na aeropuerto. Esaki, entre otro, door di falta di personal na autoridadnan di frontera, problema technico — principalmente cu paso automatisa di frontera — y uso limita di e app di pre-registracion di Frontex door paisnan Schengen.

CUATRO ORA DI ESPERA

Actualmente, 35% di biaheronan no-EU mester wordo registra ora nan drenta area Schengen. Si durante luna pico juli y augustus tur punto di frontera ta obligatorio bou e sistema, segun sector, esaki lo causa perturbacion serio. Tempu di espera por aumenta te cuatro ora of mas.

PIDI FLEXIBILIDAD

Sector di aviacion ta yama riba European Commission pa duna paisnan miembro te final di oktober 2026 opcion pa suspende e sistema parcialmente of completamente. Sin e flexibilidat aki, segun nan advertencia, no solamente operacion na aeropuerto ta den peligro, sino tambe reputacion di EU como destinacion eficiente y hospitalario. Un portavoz di Comision Europeo a indica siman pasa cu posibilidad pa suspende e sistema si tin. Aeropuertonan por sigui controla riba manera bieu te poco despues di zomer.