Expertonan ta yama pa prohibicion mundial riba software di AI cu ta desnuda hende

AMSTERDAM - Mas cu cien organizacion internacional a hunto den un manifesto cu ta pidi un prohibicion riba aplicacionnan cu por “desnuda” hende digitalmente riba foto. Na Hulanda, entre e parti cu a firma e manifesto tin municipio di Amsterdam y bureau di experticia pa abuso online Offlimits.

Den e manifesto ta wordo yama pa un prohibicion mundial riba esaki cu nan ta yama nudifying tools. E tecnologia aki, cu ta wordo usa principalmente pa manipula imagen di muhennan, mucha muher y mucha, ta trae riesgo serio, manera explotacion sexual y chantaje. Plataforma di social media X a drenta recientemente den controversia, pasobra su chatbot Grok tambe por a crea imagennan di  hende sunu  falso.

E manifesto ta pidi gobierno nan pa introduci leynan den maximo dos aña cu ta prohibi uso, distribucion y benta di e tipo di toolnan aki. Tambe tin un yamada pa companianan di tecnologia y pa publico general pa tuma accion contra e tecnologia danino aki y pa limita e consecuencia nan cu e ta causa.