Bandera di Aruba a luci durante half time show di Bad Bunny na Superbowl

SANTA CLARA – Aruba su bandera ( y di Bonaire y Corsou ) a luci diadomingo anochi durante e half time show di e wega di Superbowl di e artista Puertoriqueño Bad Bunny. E artista a sa di mantene e show completamente na spaño, cu ta algo nunca visto ainda den un wega totalmente mericano. Hopi a wak e show, djis pa wak si e artista ta ‘comporta’ su mes y si e ta mantene e show completamente na spaño. Tambe a kere cu e ta bay protesta un biaha mas contra ICE, e instancia di Merca cu ta persigui ilegalnan na Merca. Loke niun hende a spera, sigur no na Aruba, di a wak e bandera di Aruba, grandemente entre centenares di bandera di paisnan latino mas tanto. Por a mira claramente na parti final di e show, con e bandera tabata luci durante e caminata di Bad Bunny. A nota tambe bandera di e.o. Bonaire y Corsou. Cu esaki, e bandera di Aruba a keda exponi na biyones di persona instantaneamente rond di mundo. 

E IMPACTO

E wega, y e half time show, ta asina grandi, cu artistanan cu ta presenta, no ta wordo paga, pasobra e pensamento ta cu e cobertura cu nan ta ricibi, ta asina grandi, cu e ta surpasa cualkier pago. Propagandanan cu ta pasa durante e wega, ta varia di mei miyon pa miyon of mas, pa minuut, si no ta mas. Asina hopi impacto e programa y wega aki tin. Pues pa e bandera di Aruba forma parti di e show, den un solo tiro, a haci e artista hopi stima pa Aruba. 

EFECTO LOCAL

Mesora despues di e show, rednan social local a explota cu arubianonan emociona di a mira e bandera di Aruba. Un tras di otro, e postnan a cuminsa subi, cu e pregunta, cu ‘bo a wak e bandera di Aruba?’. Y cu esaki, por a nota cu practicamente henter Aruba e biaha aki a dicidi di mira e halftime show, y esnan cu no a mire, lo busk’e sigur pa wak, aunke ta djis pa nan wak e bandera di Aruba. Potret cortesia di Jurienne Tromp.