SEPPA ta exigi pa Gobierno cumpli cu loke a wordo palabra cu Arubus

ORANJESTAD - Situacion di trahadornan Arubus NV ta keda empeora, esaki apesar cu e ex-Minister U.Arends den nomber di gobierno di Aruba y como representante di e doño di e  compania di pueblo a compromete di pone e fondonan disponibel pa resolve e problema (nan) di e trahadornan.  Esaki no a sosode!!.  Pero e Minister actual tampoco a hasi nada apesar di su tanto promesanan tambe. Popchinan den gobierno por wel di cambia pero e compromiso tey caba. Na 2025, atrobe  gobierno no a pone placa.  Muestra cu simplemente, no a y tampoco kier cumpli ! Asina e sindicato SEPPA ta informa diabierna.

PROTESTA 

Segun e sindicato, den  e ultimo aña(nan) ta hopi biaha caba trahadornan di Arubus NV a bai den accion di protesta contra e hecho cu no ta cumpli cu trahadornan.  A core impone un structura salarial di cual a keda proba cu esaki ta bai contra di derecho adkiri di e trahadornan y cu ta un structura salarial cu solamente a wordo traha pa acomoda interes di e compania. “Ta di unda ta sali cu ta laga traha un structura salarial di cual ta haya resultado, pero di cual e compania por a escoge esun cu ta combinie,  esun mas abao?. “.

Mas tristo segun e sindicato, ainda ta  cu ora a trata e tema aki di Structura salarial, Ministernan na mesa, tanto esun anterior como esun actual ta mustra cu berdad no por a yega impone e structura salarial sin cu tin un acuerdo riba mesa. Structura salarial ta parti di negociacion di un contrato collectivo di trabao. !  “ Pero kico a wordo hasi pa soluciona esaki??   Minister Arends alomenos a indica di lo pone fondo disponibel pa asina e Gerencia por yega na acuerdo cu trahadornan y e Minister actual ta bisa cu no tin placa y ta keda tambe sin hasi algo !. Esaki apesar cu e Minister actual di su banda a dirigi dos carta fecha 8 september 2025 y otro 1 oktober 2025 inidicando di lo kier yega na solucionnan pero ainda trahadornan ta wardando. !!!  Pero trahadornan Arubus si tin cu sinta para un banda wak con tur otro caminda ta haya beneficionan, ta baha aki y ta duna aya, cual ta super bon. Pero trahadornan di Arubus tambe mester ricibi parti di e bolo. Y ta su ora !”, e sindicato su comunicado ta sigui bisa. 

DOÑO DI ARUBUS

Pais Aruba ta e doño di e compania Arubus NV y tin un compromiso etico y moral pa cu trahadornan di  Arubus y pa cu esaki no por sigi core pa solucionnan.   Trahadornan ta  den espera di  un solucion pa añas y cumplimento di esaki no por keda wordo alarga mas. SEPPA ta exigi pa Gobierno di Aruba, por medio di e Ministro di Husticia cumpli cu loke a wordo palabra, esta Fondo lo wordo poni disponibel pa e compania pa asina Arubus NV por yega na acuerdo cu  SEPPA. Ta hopi tempo caba trahadornan ta wardando riba e confirmacion di gobierno riba ki dia fondo ta wordo traspasa pa Arubus NV pa yega na un acuerdo riba e asunto di structura salarial, ki dia e lumpsum pendiente ta wordo paga.

STRUCTURA SALARIAL

Y e problematica aki ta apart di e discusion di e Structura salarial cu a keda impone. Tambe tin e tema di negociacion CAO Arubus NV.   Akinan tampoco tin niun reaccion ki dia nos ta bai sinta na mesa y negocia. Cada biaha nos ta tende cu gobierno mester pone fondo pa por negocia. “E situacion aki no por sigi y esaki ta mensahe cu ya caba tanto Gerencia di Arubus como e Minister encarga Sr.A.Dowers ja a ricibi.   For di e Raad di comisariado ta keda pusha e batata den scochi di Gerencia, pero ora papia cu Gerencia tanto den pasado como actual ta bisa cu e Comisariado mester bai di acuerdo.

Pues, for di tur skina ta corre pa e discusion y e responsabilidad.  Tristo, pero nos ta duda cu e corremento aki ta sosode sin cu ta wordo compensa pa carga e responsabilidad, pues pa mientrastanto di Comisariado pa Minister tur ta cobra. E situacion aki solamente lo hiba nos den mas conflicto cu ya ta ey caba”.