Comision Europeo ta considera TikTok adictivo, y ta menasa cu multa grandi

BRUSELAS - TikTok ta asina adictivo cu e ta viola reglanan europeo. Na e conclusion provisional aki e Comision Europeo a yega . E investigacion riba e compania, cu tin su origen na China, a cuminsa na februari 2024. E Comision ta bisa cu TikTok tin hopi funcion cu ta haci e uso di e aplicacion hopi adictivo pa usadornan. E algoritmo ta diseña di tal manera cu usadornan ta sigui scrol sin fin. E app sa pa cada usuario con pa tene su atencion pa e mayor tempo posible. Ora un usuario mester laga su telefon, notificacionnan push ta invita e usuario pa bolbe bay riba e app. Ken cu primi riba un notificacion ta ricibi direct un flujo nobo di mensahenan cu video cu ta cuminsa hunga automaticamente.

BOETE HALTO

Segun e Comision, tur esaki huntu ta haci cu usadornan ta usa e servicio di forma compulsivo. Esaki por ta dañino: TikTok ta representa un peligro pa salud mental y fisico, segun e Comision. Pa menor di edad, e riesgo aki ta aun mas grandi. Como ehemplo, e Comision ta menciona e uso di TikTok durante anochi, ora cu, specialmente pa menor di edad, lo tabata mas mihor si nan ta durmi. E compania ta conciente di esaki, pero mes cos e ta sigui ofreci un servicio adictivo. Segun e Comision, e compania no a analisa suficiente e riesgonan cu esaki ta trae. TikTok por reacciona riba e hallazgonan provisional aki. Si e compania no logra defende su mes suficiente, un multa grandi ta menaza. E boete por yega te maximo 6 porciento di e facturacion anual di e compania di social media. Esaki por nifica multanan cu ta yega den mil miyon. Ademas, e compania por wordo obliga pa implementa cambionan den su servicio.