Durante dos razzia diferente, polis a haya droga, arma y municion

ORANJESTAD – Dialuna Cuerpo Policial a informa cu den luna di januari 2026 departamento Atraco Team yama como (Team Bijzondere Projecten) a tene dos entrada hudicial riba diferente dia na diferente adres.  

Ta trata di un investigacion andando y na unda cu a haci detencion y confisca varios arma di candela, municion y gran cantidad di droga. 

Tambe riba 19 Januari 2026 Team di Aresto a haci un entrada hudicial na un cas na Boliviastraat. Durante e entrada hudicial a detene e homber di inicial N.R.R. naci na Hulanda di 27 aña. Durante e entrada hudicial a confisca un revolver y un cantidad di droga.

Despues dia 20 januari 2026 Team di Aresto a haci un entrada hudicial na un cas na Caya Frere Henricus. Na e entrada hudicial encuestion a detene e homber di inicial B.A.B. naci na Aruba di 35 aña. Na e cas a confisca varios arma di candela, municion y un gran cantidad di droga na e cas.