Pontilius: Minister mester pidi pueblo despensa pa e blunder di dia liber di Dia Di Betico

ORANJESTAD – “Minister (Cicilia) mester a sali pidi despensa publico y e cos lo a caba eynan” ta palabra di ex mediado y ex sindicalista Anselmo Pontilius den e programa Noticiacla LIVE diahuebs anochi. “Admiti semper ta un grandesa”, Pontilius a sigui bisa. E ta contesta pregunta di moderador Tito Laclé, riba e echo cu gobierno a haye (lesa: minister Wendrick Cicilia) ta hala su decision atras recientemente pa cambia dia liber di Dia di Betico di 25 di januari 2026, pa dialuna 26 di januari 2026, debi cu e fecha official ta cay riba un diadomingo.  

MINISTER A COMETE UN BLUNDER

Pontilius ta considera cu e loke cu Cicilia a haci, ta un blunder. ‘Afterall!’, e la contesta Laclé cu a puntr’e si e ta considera e acto como un blunder. “Den e caso aki, nos tur por comete eror, e grandesa ta pa admiti”. Ademas Pontilius ta bisa cu esaki mester ta un les pa e minister. A mustra cu si kier haci cambio, mester hacie dentro di e Sistema legal. Algo cu no ta imposibel ya cu un di e cantida di dia libernan di Aruba, a keda regla den pasado, cu si e dia liber cay riba diadomingo, por hale. 

PAKICO E TA UN FOUT?

Segun Pontilius, fuera di e Dia di Betico, tin mas dia asina, manera 18 di maart, Dia di Rey y mas. “Y nos tabata sa 10 aña pasa of 5 aña pasa, cu 25 di januari 2026, ta un diadomingo” Pontilius a bisa, pues cu tur hende tabata sa masha tempo cu e fecha tabata un diadomingo. Incluso e gobierno cu ta sinta for di maart di aña pasa. Pues cu esey e ta bisa cu no tabata un sorpesa of cos cu a ‘cai fo’i shelo diripiente. “Den e caso aki, gobierno a drenta. Como gobierno, bo no por traha di e forma ey nunca. E ta ilustra un falta di profesionalismo, falta di planificacion. Bo no ta warda 5, 6 dia prome cu e dia, anto bo ta anuncia! E no ta bay!” Pontilius a sigui bisa. “Tanto e conseheronan rond di e minister, mester por sa miho!” Pontilius a bisa tambe. 

MEP Y ATIA

Partido MEP recientemente tambe a sali afo y bisa mescos, cu e minister en cuestion mester pidi pueblo di Aruba un despensa pa e loke e la haci rond di e dia liber ey. ATIA mientrastanto a mustra tambe riba e fayo aki, cu por a causa comercio hopi placa extra si e cambio lo a keda na vigor. Echo ta cu e cambio intenta, no a cay den bon tera. Sigur no cerca comercio y tampoco den area politico. Scucha e declaracion di Pontilius AKI.