Cuba ta prepara su pueblo pa guera mientras Merca ta cera e valvula di petroleo

HAVANA  – Mientras tensionnan entre Merca y Cuba ta subi te na e nivel mas halto desde e Crisis di Misil Cubano, e ambiente tabata sombrio durante un reunion reciente cu personal na Embahada di Merca na Havana. “Si bo ainda no tin bo tas empaketa, e ora empaketa bo tas,” asina  encargado di Comercio di Merca, Mike Hammer a bisa segun un persona presente durante e reunion. “E cubanonan a keha durante aña cu ‘e bloqueo’,” Hammer a bisa na e diplomatonan mericano y personal local reuni, haciendo referencia na e termino cu e gobierno cubano ta usa pa e embargo economico di Merca cu tin mas cu seis decada riba Cuba. “Pero awor lo tin un bloqueo berdadero,” Hammer a sigui bisa. “Nada lo drenta. Petroleo lo no yega mas.”

Contacta pa CNN tocante e palabranan ominoso di e diplomato, un vocero di Departamento di Estado a bisa cu nan no ta comenta riba reunionnan interno.

Aunque no tin ningun señal cu Merca ta pensa di reduci su presencia diplomatico na Havana, e advertencia fuerte ey a yega apenas algun siman despues di un incursion di Merca na Caracas, unda 32 oficial militar y di inteligencia cubano a perde nan bida mientras nan tabata proteha presidente venezolano Nicolas Maduro. Esaki a marca e confrontacion mas mortal entre forsan di Merca y Cuba desde fin di Guerra Friu.