Fundacion Anti Droga Aruba kier mas conscientisacion riba mal uzo di alcohol

ORANJESTAD - Como parti di e Common Good Conference y Expo, diferente organisacion riba Aruba ta comparti con nan ta traha activamente pa proteha e bon comun. Un di nan ta Fundacion Anti Droga Aruba (FADA) , un fundacion cu ta enfoca riba prevencion di abuso di alcohol y droga, y riba reduccion di daño social cu esaki ta causa den comunidad.

Segun e fundacion, uzo/mal uzo di alcohol ta sigui ta un reto grandi riba Aruba, contribuyendo na accidentenan, incluso accidente fatal, cu tin impacto profundo riba famianan y sociedad. Pa medio di conscientisacion y educacion, Fundacion Anti Droga Aruba ta traha pa reduci e problema aki y pa promove un comunidad mas sano y responsabel.

“Nos meta ta cu tur hende por yega cas sigur, y cu comunidad tin informacion riba uzo y mal uzo di alcohol,” segun Romyko Winklaar di e fundacion.

E fundacion ta enfatisa cu informacion confiabel ta esencial, specialmente den un tempo caminda social media por distorciona mensahe y crea confusion riba e rol y servicio di organisacionnan cu ta traha pa e bon comun. Segun Winklaar, e Common Good Expo ta un oportunidad importante pa comunidad por topa directamente cu e fundacion, conoce nan proyecto y comprende con nan trabou ta impacta bida diario di tur ciudadano.