Dowers: Siguridad di trafico ta un responsabilidad di comunidad den su totalidad

ORANJESTAD - Minister di Husticia Arthur Dowers a bisa e siman aki cu  siguridad di trafico no ta solamente un responsabilidad di gobierno y polis, sino di comunidad den su totalidad. Tabata durante su discurso, cu e la ta duna splicacion na Parlamento tocante siguridad di trafico.

REUNION

Pa motibo di e cantidad di accidente di trafico cu resultado fatal y casonan di "hit and run" den e prome simannan di 2026, Parlamento di Aruba a invita Minister di Husticia mr. drs. Arthur Dowers pa duna splicacion di siguridad den trafico. 

PREGUNTA

For di miembronan di Parlamento, Minister Dowers a ricibi varios pregunta critico riba e situacion actual, ehecucion di ley y e medidanan preventivo pa reduci e cantidad di accidente di trafico serio. Minister Dowers di su banda a contesta e preguntanan aki cu comprension y basa riba recomendacionnan di e Comision di Siguridad di Trafico institui pa e propio minister.  

RESPONSABILIDAD

Durante di e reunion a trata, entre otro, e causanan di accidente di trafico, e problematica di "hit and run", y e necesidad pa revisa nos leynan di trafico y crea campañanan di conscientisacion. Minister Dowers a enfatisa cu siguridad di trafico no ta solamente un responsabilidad di gobierno y polis, sino di comunidad den su totalidad.