Medida di Merca contra Union Europeo lo afecta Corsou tambe

WILLEMSTAD – E anuncio reciente di presidente mericano Donald Trump pa pone mas impuesto riba producto di importacion di ocho paisnan europeo, cu Hulanda tambe inclui, ta crea un situacion serio den comercio mundial. Segun analista geo-politico Idelgar Sosa, e extra impuesto di 10% como medida di presion pa e conflicto pa anexa Groenland lo mas lihe posible, pa e bira un territorio di Estados Unidos (USA) pa garantiza un defensa di territorio mericano mas mihor, no ta afecta solamente Union Europeo den su totalidat, sino lo tin consecuencia directo pa consumidor nan na Corsou.

Especialmente pa nan forsa di compra y tambe pa e mayornan cu tin yiu cu ta studia na Hulanda. Esaki ta debi cu for di 1 di februari 2026, Estados Unidos (USA) lo cuminsa cobra un extra impuesto di importacion di 10% riba tur producto cu ta bini for di Hulanda tambe. Si no tin ningun acuerdo riba e peticion di Merca pa logra tuma e territorio di Groenland, apesar cu Groenland tin su propio derecho di zelfbeschikkingsrecht, e impuesto impone aki lo subi na 25% for di 1 di juni 2026.

Maske e impuesto aki ta wordo paga na frontera mericano, e efecto aki toch ta crea un cadena di problema; entre otro lo bai tin un guera di comercio, unda Union Europeo lo reacciona cu extra impuesto contra producto mericano. Preis di hopi producto lo subi, pasobra Hulanda lo pasa e costonan mas halto di importacion pa e consumidor.

Esaki lo crea mas inseguridad den economia, pasobra compania nan lo inverti menos. Hulanda lo bai haya un golpe, mescos cu otro paisnan den Union Europeo. Esaki lo tin consecuencia pa estudianan di Corsou na Hulanda. Bida lo bira mas caro pa nan.

Ta asina cu e costonan na Hulanda lo sigui subi; entre otro lus, gas, comestibel etc. Di otro banda, Corsou ta depende di varios producto di importacion for di Hulanda.

E producto nan cu ta pasa via Hulanda lo bira mas caro prome na Hulanda mes y despues Corsou lo haya nan cu e recibo presenta. Na e mesun momento, producto mericano riba nos isla lo por subi tambe. Cu otro palabra, pueblo di Corsou lo por cuminsa sinti e subida di prijs nan, drastico na supermercado y den toconan for di e di dos cuartal di 2026.

Sosa ta bisa cu nos mester prepara tambe pa e proximo golpe economico, cu lo ta e subida di 25% di impuesto americano cu por drenta na juni 2026, si Estados Unidos, pa e fecha menciona, no logra acuerdo cu Union Europeo pa anexa Groenland.

E situacion aki no ta un problema chikito of local solamente; e ta un problema serio riba nivel mundial, unda e hende comun cu tur dia tin cu lanta y bai labora, ta esun cu finalmente ta paga e cuenta final. Debi cu Corsou tin un economia chikito y habri, nos ta hopi mas sensitivo pa shock economico internacional, segun e analista geo-politico Idelgar Sosa. Pesei nos mester sigui prepara pa e desaroyo nan nobo riba nivel mundial, pa nos por adapta nos forma di biba cu menos molestia economico.