Noticia di Noticiacla confirma: Livingstone Jan Thiel ta bira Sonesta Hotel

WILLEMSTAD – E noticia primicia di noticiacla.com, a keda confirma e siman aki, pero tambe cu un clarificacion. Noticiacla a publica e siman aki cu e cadena hotelero Sonesta ta bolbe Corsou. Tabatin e indicacion cu lo a bay traha un hotel nobo, pero esaki no ta e caso. Esaki no ta e kaso pasó ta Livingstone Jan Thiel (Corendon) lo bira Sonesta. Esaki ta loke EXTRA a komprendé den kòmbersashon ku Norman Serphos, relashonista Públiko di Corendon. Bèrdat ta ku Sonesta ta bin Kòrsou pero no ku un hotèl nobo. Livingstone Jan Thiel di Corendon lo bira Sonesta hotel, segun Serphos. Meskos ku tin Corendon na Otrobanda ku ta kargá pa e marka di Curio by Hilton, meskos lo sosodé ku Livingstone kaminda e marka Sonesta ta tuma over. “Tur kos ta keda meskos i ta solamente e nòmber ta bira Sonesta, pa asina atraé mas turista di diferente pais. Awor akí Livingstone ta atraé mas ulandes i dor di bin ku e marka Sonesta ta bai konsentrá tambe riba turistanan di Canada, Merka i Sur Amérika”, Serphos a bisa.

Sonesta ta un marka grandi meskos ku Hilton. Tin turista ku ta biaha rònt mundu ku Hilton pasobra nan ta fiel na Hilton i meskos ta konta pa Sonesta. E speransa ta ku awor akí Livingstone ta haña 100% turistanan ulandes pero nan enfoke ta pa 50% merikano, kanades i sur amerikano i 50% ulandes. E kambio di nòmber mes lo tuma lugá den e di dos kuartal di e aña aki. Aktualmente ta finalisando e negosiashonnan pa asina e por bira formal. I ku e kambio di nòmber outomátikamente lo bin invershonnan ku ta e rekisitonan ku e marka di Sonesta ta eksihí komo nan stándar. Pero tur esei lo mester atendé ainda. Livingstone Jan Thiel ta konta ku 204 kamber di kua 90 ta vila i 114 ta kamber di hotèl.

SONESTA

Riba retnan sosial Sonesta International Hotels Corporation a anunsiá realisashon di un akuerdo pa un hotèl nobo di Sonesta na Kòrsou. Lo establesé e hotèl den área di Jan Thiel. E hotèl lo kai bou di e marka Sonesta Hotels, Esorts & Cruises. Sonesta a eksplotá diferente hotèl na Aruba, Boneiru i Kòrsou den e último dékadanan. E hotèl nobo lo reforsá presensia di Sonesta den e region atrobe. Segun Sonesta e kompania tin hopi plan pa habri mas hotèl den e region. Keith Pierce, presidente Franchise & Development di Sonesta, ta splika ku e ta hopi kontentu ku presensia di Sonesta ‘riba e isla bunita di Kòrsou’. NOTA: Texto ta scirbi den papiamento fonetico di Corsou.