Denuncia di corupcion na Cas di Corsou na Hulanda y Gev.Min, no a yega OM ainda

WILLEMSTAD - Te ainda e denunsia kontra di korupshon na Kas di Kòrsou i minister plenipotensiario Carls Manuel, no a yega na Ministerio Públiko (OM). Esaki ta loke ku bosero di Ministerio Públiko sr. Roderick Gouverneur a duna di konosé na EXTRA.

Den wikènt tras di lomba, un karta ku sr. Jordan Pietersz a manda pa gobernadó, hasiendo denunsia kontra di e minister plenipotensiario Manuel, relashoná ku kasonan di korupshon, a bira públiko. Den e karta por tuma nota ku direktor di Gabinete di Gobernadó den un mail di dia 8 di yanüari último, a informá Pietersz ku gobernadó a risibí su karta via di mail dia 26 di novèmber 2025. Tambe ku e karta lo a keda mandá pa Ministerio Públiko.

Sr. Gouverneur a bisa EXTRA, ku nan tambe a tuma nota di e karta den medianan sosial. Sinembargo ainda e karta aki no a yega OM. “OM ta warda e karta pa wak kon ta sigui”, Gouverneur a deklará.

Pa basta ratu kaba, sr. Pietersz a hasi denunsia di kasonan di korupshon kontra di Manuel. Den vários publikashon riba su ret sosial, e ta hasi menshon ku taksinan ku ta transportá mandatarionan di Kòrsou na Hulanda, lo ta kobra sierto porsentahe di mas. E suma di mas lo ta bai pa Manuel. Tambe ku e, esta Pietersz mester a paga Manuel un suma di plaka, dor di depositá esaki riba su kuenta, pa e por a haña trabou na Kas di Kòrsou. Hasta el a publiká potrèt di tur e transakshonnan ku el a hasi pa kuenta di Manuel.

E minister plenipotensiario Manuel, te ainda no a sali kontradesí tur loke ku Pietersz a trese dilanti.

Dia 19 desèmber 2025, parlamento den su totalidat, pues hasta frakshon di MFK a bai di akuerdo ku un moshon pa investigá maneho finansiero di Kas di Kòrsou i Minister Plenipotensiario. Den e moshon ta indiká ku pa hopi tempu tin diskushonnan insistente tokante maneho finansiero i di personal na Kas di Kòrsou. Diferente trahadó a bandoná Kas di Kòrsou i a ekspresá nan preokupashon di forma públiko tokante e maneho di personal i finansiero; Yüli 2025 a bira públiko ku Parlamento di Kòrsou no a risibí dokumentonan finansiero pidi for di aña 2023 na Kas di Kòrsou i Minister Plenipotensiario; Despues di a risibí e dokumentonan relevante di Kas di Kòrsou na yüli 2025, departamentu finansiero di Parlamento a analisá e dokumentonan risibí i a konstatá lo siguiente: Aña 2022 tin un diskrepansia di ANG 14.779 (39.3%% di e totalidat) den fakturanan di mas paga na Kas di Kòrsou i fakturanan deklará; Tin fakturanan kobra dor di Kas di Kòrsou na nòmber di miembronan di Parlamento ku no a biaha pa Hulanda; Tin diskrepansia entre gastunan di transporte di Taksi kobrá dor di Kas di Kòrsou, i e fakturanan risibí pa Partamento; E sistema di pago na Kas di Kòrsou ta sosodé di tal forma ku Parlamento no por kontrolá pagonan hasí; Ta posibel ku tin pagonan inkorekto (onrechtratig) a keda hasi na Kas di Kòrsou dor di Parlamento di Kòrsou. Tur esaki ta hasi nesesario pa via di un investigashon independiente, Parlamento por determiná integridat, legalidat i efektividat di e maneho finansiero di Kas di Kòrsou, di e periodo 2022-2025. Den e moshon a disidí ku Parlamento ta hasi petishon na Kontraloria General pa mas pronto posibel inisiá un investigashon na e integridat, legalidat i efisiensia di e maneho finansiero di Kas di Kòrsou, i Minister Plenipotensiario durante di aña 2022 pa 2025. Awor e denunsia aki ku ainda tin di yega OM. NOTA: Texto scirbi den papiamento fonetico di Corsou.