Aruba ta conoce su di 3 morto di trafico pa 2026 den 7 dia

ORANJESTAD - Diamars mainta pa 9:15 Central di Polis a wordo notifica di un accidente pisa riba e caminda principal Seroe Teishi.  E prome informe ta indica cu un auto lo mester a bolter y e chauffeur no ta reacciona.  A despacha polis como tambe ambulance cu maximo urgencia na e sitio. Na yega di polis enberdad a topa cu un Toyota Yaris color blauw numera A-69472 y e chauffeur situacion tabata  grave.  Ambulance ta yega na e sitio di e sucedido y ta brinda e prome assistencia medico pa despues stabelisa e victima y bay cune cu maximo urgencia pa Hospital.  Specialista di trafico y polis technico a presenta pa haci nan investigacion.  Departamento di slachtofferhulp tambe a wordo notifica pa brinda sosten na e victima y su famia. 

Lamentabelmente awe diaranson mainta Polis ta wordo informa cu pa 8:35 am e chauffeur a fayece. Ta trata di e hoben Ronal Heredia Heredia naci riba 30-04-2008 (17 aña) na Republica Dominicana . Cuerpo Policial ta manda palabra di condolencia y forza na e famia di e fayecido.  Lamentabelmente nos mester menciona esaki ta bira e di tres accidente fatal den trafico. Un suplica na nos comunidad pa ban trankilo den trafico. Ban mantene un trafico SIGUR pa un y TUR!