Analisis: Situacion na Venezuela: Pakico awor Delcy si y Machado no?

 Scirbi pa Tito Laclé

E situacion den fin di siman unda cu Merca a drenta Venezuela y bay cu e presidente venezolano y su casa, a crea un ola di reaccion tur caminda, y si, na Aruba tambe. Nos tabata spera algo pasa, pero no tabata sa exactamente kico. Cu 25% di e armada Mericano den nos region, no tabata cuestion si algo lo pasa, sino mas bien ki ora y kico. Aki na Aruba, mientras cu mundo tabata mira desaroyo di Venezuela, nos tabata mas ocupa pa regla loke nos mes a haya nos den dje, y cu ‘nos’, mi kier men Aruba su autoridadnan den e ramo di turismo, DOOR di e acto di Merca. Hopi di nos tabatin miedo cu si cuminsa un atake, cu Venezuela lo a reacciona y manda misil den nos direccion como distraccion pa e mericanonan. Esaki no a sosode, pero asina mes nos a sinti e efecto directo di e accion conoci awor di Merca, di otro forma. Cierre parcial di e espacio aereo di islanan ABC tabata suficiente pa paralisa trafico aereo for di Merca y Europa pa un dia y mei, cu tur e consecuencia logistico cu esaki a bin cu ne. Enfin, esey tabata e efecto ey y nos a sa di maneha e situacion hopi bon, bou di condicionan fastioso. 

PAKICO DELCY A KEDA Y NO A TRECE MACHADO

Pero awor, e tema tabata con bin Merca a bay solamente cu Maduro y su casa, y a laga e otronan manera Delcy Rodriguez, Vladimir Padrino y Diosdado Cabello, siendo cu nan tambe lo ta ‘parti’ di e grupo cu tabata manda na Venezuela? Localmente hopi ta pensa cu nada no a cambia, si no core cu e tresnan menciona tambe. Y a cuestiona tambe pakico no a pone e opositor Machado na su lugar mesora. Pero, mester pensa mas leu. Laga mi splica. 

E LOGICA REAL

Lagando e tresnan den nan funcion, esta Rodriguez, Padrino y Cabello, e ta duna Trump e espacio pa por sigui cu un cambio ‘ordena’, sin cu ta paralisa e pais, cu salida di Maduro. 

Mester compronde cu den un transicion duro manera esaki, mester por deal cu esnan cu por ‘paga candela’ (Rodriguez), y no cu esun cu tin e razon moral (Machado).

Delcy Rodriguez ta representa tres cos cu Trump mester awor. 1. Continuidad administrativo, control di PDVSA, banconan, wafnan. Sin esey, e pais ta paralisa. Mester di contacto cu e militarnan, inteligencia colectiva. Delcy lo no manda su so, pero lo coordina segun orden di Merca, suministra informacion, ordena militar etc. Pakico Maria Corina Machado no ta den e pantaya ainda? Aunke pa hopi e ta haci dolor, e realidad ta cu Machado aworaki, no tin control di e armada, no tin control di e teritorio, no tin control logistico, y no por garantisa cu mayan no tin violencia den  pais. Y den un fase di choque, esey ta pisa mas cu e legitimidad, voto of su popularidad. Y awor e realidad duro. Pa e chavismo duro, Machado ta un menasa existencial. Si pon’e na poder aworaki, e ta blokea cualkier negosacion inmediato cu e instancianan menciona. Pa loke ta Edmundo Gonzalez cu lo ta esun cu Trump ta reconoce como e president legitico di Venezuela, pa awor e ta solamente un simbolo electoral, un figura di consenso civil. E no ta un operador di poder actual. E ta sirbi pa despues. No awor pa paga ‘e candela’. E ta un logico friu pero contundente. Un transaccion semper ta pasa den tres fase. E prome ta: controla e chaos. Ta negocia cu esnan cu tin e armanan, esnan cu por controla e violencia of par’e, sa unda tin e trampanan y aki ta unda cu Trump mester di Delcy Rodriguez. No ta pasobra e ta gusta Delcy. E fase dos ta unda cu e reacomodo di poder ta cuminsa. Ta cuminsa mete civilnan, techniconan, actornan acceptable, unda cu p.e. Edmundo Gonzalez por drenta, y otro miembronan di oposicion. Y e fase tres, ta e legitimitacion, unda cu ta bin cu eleccion unda cu e narativa ta bira Machado. Pero esey ta te na final. No awor na e comienso. E problema ta e eror emocional venezolano, cu ta pensa cu si Maduro a cay awor, esnan bon manera Machado, ta bin manda mesora. No. Prome, ta manda esnan cu por evita cu e pais por kima, y despues ta manda esnan cu por goberna temporalmente y despues esnan cu por representa un cambio real. Esaki no kier men awor cu Machado ta afo di e wega, sino no ta e carta pa e momento actual. Si pone Machado awor, lo ta yamando eleccion mei mei di un candela, cu no tin sentido. Si e transicion avansa, Machado no ta bira esun cu ta bay negosha tur cos, sino esun cu ta bay legitimisa e cambio, y ta capitalisa tur cos. Si despues sake for di e wega, e ora esey si o ta malo. Awor no. Awe ta papia cu Delcy, mayan cu civil, y despues cu e pais en general. E storia nunca ta cuminsa unda cu e pueblo kier. Tene esey na cuenta..