Pisas: Corsou no ta hasi ningun exprecion p’e forma con Merca a captura Maduro

WILLEMSTAD - Corsou ta sigui Hulanda, i no ta hasi ningun ekspreshon rondó di e kaptura di presidente Venezolano, Nicolas Maduro, dor di Merka. Esaki ta loke ku promé minister, Gilmar Pisas, a duna di konosé na prensa. Djasabra mardugá Kòrsou i mundu a keda di shòk dje akshon di Merka, ku a drenta Venezuela i a kapturá e presidente dje pais.

Relashoná ku e intervenshon di Merka den Venezuela, promé minister a aktivo e ‘Crisis Team’. Despues ku tabatin klaridat dje akshonnan di Merka, promé minister Pisas a dirigí su mes na pueblo di Kòrsou, indikando ku Kòrsou no ta den krísis pa loke a sosodé na isla bisiña, Venezuela. Promé minister a indiká ku e tabatin kontakto ku presidente di Hulanda sr. Schoof, kende a indiká ku e islanan ABC por konta ku sosten di Hulanda ketu bai.

Mas aleu promé minister a bisa ku Kòrsou ta den Reino i ta keda neutral. P’esei lo no hasi ningun ekspreshon riba e kaptura di Maduro i e intervenshon di Merka den Venezuela. Tambe e promé minister a ekspresá su temor, ku venezolanonan por sali for di e pais pa drenta Kòrsou. P’esei wardakosta i tambe defensa hulandes ta prepará pa e situashon akí, i ta sigui patruyá. Pasobra Kòrsou no por akapará tantu hende asina. Tambe gobièrnu ta konsiente ku ora e venezolanonan yega Kòrsou, nan ta hasi apelashon riba artíkulo 3 di EVRM, kual ta Tratado di Derecho di Hende Oropeo. Ta spera ku Kòrsou lo no haña fluho di hende pasó te ainda no tin un sitio adekuá pa akapará e hendenan aki. Aunke ku lo tabata buskando un sitio, segun sr. Lesley Fer di Mantenshon di Rísiko i Krísis na Kòrsou.

Pa personanan ku nashonalidat hulandes na Venezuela: Ta urgi personanan ku nashonalidat Hulandes ku ta na Venezuela aktualmente, pa registrá na Embahada di Reino na Caracas. Esaki ta posibel pa medio di e siguiente link: https://informatieservice.nederlandwereldwijd.nl. Esaki tambe ta konta pa Hulandesnan Karibense.

Minister enkargá ku ekonomia i turismo, sr. Roderick Middelhof, a informá ku pueblo no mester drenta pániko, pasobra tin remedi i kuminda pa 3 luna. Kombustibel tin pa 1 luna i mei. Esaki tabata pa evitá ku hende ta hansha pa bai kumpra kos i nos mes trese pais den krísis.

Huntu ku avionnan ku ta bini for di Merka ku a kanselá nan buelo, Corendon, KLM i TUI tambe a kanselá tur nan buelonan djasabra. Ta asina ku Corendon tabatin 432 pasahero, KLM 600 i 900 TUI. A pidi hotèlnan pa por akapará e pasaheronan aki ku tabata nan wéspet pa 48 ora riba gastu dje hotèl mes. Mester bisa ku for di djadumingu avionnan a kuminsá bula bèk i a ‘reschedule’ e pasaheronan pegá na Kòrsou. Pa loke ta trata barku krusero, tabatin kanselashon di 1 krusero pa dia 5 i 1 pa dia 6 di yanüari. Djasabra mes por a tuma nota di 1 krusero mará na Mega Pier, i ayera djadumingu tabatin dos krusero na Mega Pier. NOTA: Texto ta scirbi den papiamento fonetico di Corsou.