75% di buelo pa Aruba a keda cancela diasabra

ORANJESTAD — Un total di 75% di buelo pa Aruba a keda cancela diasabra, a consecuencia directo di e atake mericano na Venezuela.  Pero, segun informacion di aeropuerto di Aruba, diadomingo operacion ta normal bek. Diasabra, for di 58 vuelo di entrada y salida cu tabatin programa, a cancela un total di 44 vuelo, incluyendo 38 vuelo di Merca y 7 vuelo di otro paisnan. Aeropuerto di Aruba ta trahando den coordinacion estrecho cu partnernan di aerolinea y autoridadnan di aeropuerto pa acomoda e pasaheronan afecta na un manera sigur y eficiente.

Como resultado, aeropuerto ta anticipa un dia operacional mas ocupa cu normal mañan, ya cu awe originalmente tabata anticipa pa ta un dia di biahe di gran cantidad di pasahero (“Super Saturday”), cu 58 vuelo y aproximadamente 15.000 pasahero programa pa procesa. 

Ta conseha e pasaheronan cu vuelo confirma pa yega aeropuerto na tempo pa nan salida programa. Medidanan di control di fluho di pasahero lo keda na vigor pa sostene operacionnan safe, sigur y ordena. 

Pasaheronan cu nan vuelonan a keda cancela awe, como tambe biaheronan sin un vuelo confirma, ta conseha encarecidamente pa no presenta na aeropuerto y pa tuma contacto cu nan aerolinea directamente pa rebooking y areglonan di biahe. 

Aeropuerto di Aruba lo sigui vigila e situacion di cerca y duna  actualisacion manera cu ta apropia. Ta curasha e pasaheronan pa check directamente cu nan aerolinea y bishita www.airportaruba.com pa haya e informacion di vuelo mas actualisa.