IMF: Subida di nivel di laman ta un riesgo economico directo pa Aruba

ORANJESTAD – Fondo Monetario Internacional (IMF) ta califica subida di nivel di laman explicitamente como un asunto financiero y economico directo pa Aruba. Den un Selected Issues Paper nobo, IMF ta liga e amenaza di cambio climatico pa prome biaha cu cantidat concreto y decisionnan di politica, y ta mustra cla kico no haci nada ta costa y kico interveni na tempo por ahorra. Segun IMF, sin adaptacion, subida di nivel di laman por costa Aruba na largo plazo un promedio di mas o menos 0,8 porciento di producto interno bruto (PIB) pa aña. E daño aki ta resulta principalmente di inundacion permanente di zona di costa, perdida di capital y mudanza obliga di habitantenan. Pasobra un gran parti di economia, infraestructura y poblacion ta concentra na costa, IMF ta yama e riesgonan macro-critico, cu consecuencia pa finanza gubernamental, turismo y sostenibilidad di debe.

POLITICA

Na mesun tempo, e fondo ta enfatisa cu politica si por haci diferencia. Cu proteccion di costa planifica, manera murownan di laman y refuerzo di dunanan, Aruba por reduci e daño spera cu mas o menos cuarenta porciento. Segun IMF, e enfoque aki ta rekeri inversionnan publico structural di un promedio di 0,4 porciento di PIB pa aña, pero e ta evita perdida mucho mas grandi na futuro.

AUN MAS FAVORABEL

E raporta tambe ta describi un alternativo cu por sali financieramente aun mas favorabel: Retirada planifica for di zona di costa vulnerabel. Pa no permiti mas inversionnan duradero nobo den area di riesgo y move construccion gradualmente mas pa adentro di tera, e daño anual por baha te mas o menos 0,2 porciento di PIB. Segun IMF, esaki ta haci di e estrategia aki e opcion mas barato na largo plazo, siempre cu e wordo implementa na tempo y de manera coordina.

MENSAHE CENTRAL

E mensahe central ta cla: subida di nivel di laman pa Aruba ya no ta un escenario futuro, sino un riesgo financiero medibel. Door di scoge awor pa adaptacion dirigi, e gobierno por limita milyonan na daño futuro; retraso, na cambio, ta aumenta e cuenta economico cu lo mester paga despues.