- Le Lanchon: Gaia House of Grill ta Aruba su ‘upscale’ restaurant mas nobo di Aruba
- Prijs di gasoline ta habri aña cu un reduccion considerabel diaranson
- Cantante Julio Iglesias (82) acusa di violacion y explotacion di empleadonan hoben
- Tres shen studiante caribeño lo ricibi guiamento adicional pa nan estudio na Hulanda
- Rey Willem-Alexander: ‘Hulanda y Corsou lo yega leu na Mundial’
Modernisacion di derecho penal y proceso penal na Caribe ta bay desigual
WILLEMSTAD/ ORANJESTAD – E modernisacion di e derecho penal y proceso penal den e parti Caribe di Reino ta progresando, pero no ta bay mescos na tur paisnan. Aruba ya a introduci e Wetboek di Proceso Penal renoba, Corsou a acepta e ley pero ta pospone su introduccion, mientras cu e trayecto di legislacion na Sint-Maarten ta practicamente para. Esaki ta resulta for di e cronica Derecho Caribe, cu a wordo publica e siman aki den Nederlands Juristenblad. Segun e autornan, desde e disolucion di Antias Hulandes, a wordo traha riba codigonan separa, pero cu contenido lo mas posible mescos, pa Aruba, Corsou, Sint-Maarten y Caribe Hulandes. E meta ta uniformidad den derecho penal y proceso penal, entre otro pasobra di e practica huridico comparti den Reino. Pero te ainda e uniformidad ey no a wordo logra.
ARUBA
Aruba ta e prome pais cu a logra pasa e obstaculo. E Wetboek di Proceso Penal revisa ta na vigor desde april 2024 y, segun e cronica, te awor ta wordo aplica sin problema importante. Tambe regla adicional tocante informacion pa sospechosonan ya ta estableci, incluyendo e derecho riba asistencia medico y e obligacion pa informa familia of representacion consular ora cu un persona wordo priva di libertad.
CORSOU
Corsou a acepta e nobo Wetboek di Proceso Penal na 2025. Sin embargo, e gobierno a decide tuma varios aña pa su introduccion. Segun e minister di Husticia, prome cu e ley drenta na vigor ta necesario un amplio proceso di informacion y preparacion den henter cadena husticial. E expectativa ta cu e nobo proceso penal lo wordo aplica na 2027.
SINT-MAARTEN
Na Sint-Maarten, e revision di e Wetboek di Proceso Penal ta den tratamiento na Parlamento dende 2019, pero desde 2020 e tratamiento parlamentario ta para. Representantenan tanto di poder huridico como di Ministerio Publico a insisti varias biaha riba progreso, cu advertencia cu e falta di modernisacion ta crea riesgo pa e curso di husticia y pa e proteccion di sospechosonan y victiman. E autornan ta indica cu introduccion completo na Aruba, Corsou y Sint-Maarten ta un condicion pa harmonisacion mas amplio cu Caribe Hulandes. Solamente ora tur paisnan a implementa e proceso penal renoba, lo por wordo papia di un derecho penal y proceso penal uniforme y modernisa nobo den Caribe.
A prolonga detencion di chauffeur di accidente fatal cu a laga dos peaton morto
Diahuebs hues comisario ta dicidi si ta prolonga detencion di e chauffeur cu a causa morto di dos peaton
ORANJESTAD – E dama chauffeur cu a causa e accidente fatal lagando dos peaton morto, C. Fernandes (24), ainda deteni, lo presenta dilanti huez comisario diahuebs awor. Aki e huez comisario lo dicidi si ta prolonga e detencion si of no. Vocero di Ministerio Publico Ann Angela a confirma diamars atardi, cu lo pidi pa prolonga e detencion di e dama aki. “Finalmente ta na huez comisario pa dicidi si ta prolonga su detencion of no” e la bisa noticiacla.
Corte Superior a sentencia asesino di Sayuri Petronia na 6 aña di prizon
ORANJESTAD - Corte Superior di Husticia a dicta sentencia contra e sospechoso I.M.P. den e caso penal Last Call. E procedimento a trata unicamente e parti di castigo. I. Principaal a wordo condena na 2023 pa homicidio di un mucha muher di 19 aña, cometi riba 4 di juni 2021. Na 2024, Hoge Raad a anula e decision aki di Corte Superior, pero solamente pa loke ta e parti di castigo. Esey a nifica cu Corte Superior mester a dicidi di nobo tocante e castigo y e medida cu lo wordo impone riba e sospechoso.
Nelson ‘Speed’ Andrade ta unico periodista ainda persigui den caso di radio di polis otro aña
ORANJESTAD – Dialuna atardi, Ministerio Publico a anuncia cu nan a entrega e citacion na un di e 4 periodistanan envolvi den e caso conoci como New York, cu ta trata e asunto di radio di polis y unda cu un polis a keda cera, pa motibo di lo a yuda e grupo di periodista tin aceso na informacion ‘confidencial’ di polis. Despues cu e caso a tuma lugar e aña aki, a resulta cu 4 di e 5 periodistanan cu a keda condena, a dicidi di acepta nan condena, ta haci nan sentencia irrevocable. Solamente un periodista, conocido Nelson “Speed” Andrade, so no a toca esey. Den su caso, tanto Ministerio Publico como Andrade a apela su sentencia. E la haya e sentencia mas pisa di tur, esta haya un castigo di prison di 18 luna, di cual 12 ta condicional, y un tempo di prueba di 3 aña. A compronde cu dos di nan, Koolman y Giel, OM lo a yega na acuerdo pa ambos retira nan apelacion.
Ministerio Publico di Aruba a introduci areglo di keho pa ciudadano
ORANJESTAD - Ministerio Publico a introduci recientemente un areglo di keho (klachtenregeling) pa ciudadano. E areglo di keho ta inclui tambe un formulario di keho (klachtenformulier). Di awor pa dilanti ciudadanonan tin e posibilidad pa, na un manera relativamente facil y sin mucho obstaculo, entrega un keho. Por haya tanto e formulario como e areglo di keho riba website di Ministerio Publico: www.omaruba.com.
Pais Aruba no tin cu paga ningun multa na desaroyador arubiano
ORANJESTAD – Pais Aruba no a perde ningun multa den un conflicto cu un desaroyador arubiano, tocante e prolongacion di un derecho di erfpacht. Asina e Hof di Husticia di Reino a determina den apelacion. E empresario a bisa cu Pais a actua laat y incompleto ora di tuma desicionnan tocante un proyecto di construccion, pero e no a haya razon den su argumentacion. E caso ta trata di un tereno na L.G. Smith Boulevard, pa cual e desaroyador ta desde 2016 a haci varios peticion pa cambia e destinacion pa construccion di un compleho grandi di apartamento cu tienda. Den november 2023 Pais Aruba a rechasa esnan. Poco despues e drecho di erfpacht tambe a caba riba e tereno. Na april 2024, e huez den proceso corto a determina cu Pais a actua demasiado laat y a obliga Pais pa tuma desicionnan dentro di termino fija tocante cambio di destinacion y prolongacion di erfpacht. Na esaki a wordo imponi un multa di 10.000 florin pa dia, cu un maximo di mei medio miyon florin.
Follow NoticiaCla
