CBS: Cuminda y sali come, tur dos a bira mas caro na Aruba casi no tin escape

ORANJESTAD – Den luna di november, prijsnan di Food & catering services a subi cu 0,4 porciento compara cu october. Asina, e tendencia ascendente ta sigui, despues di un subida di 0,1 porciento den e luna anterior. Asina CBS ta informa. Tanto e costo di cuminda na cas como esun pa come pafo di cas a aumenta, cu ta nifica cu consumidornan casi no tin opcion pa evita subida di prijsnan. Prijsnan di cuminda na cas tambe a subi cu 0,4 porciento. Den e categoria aki, nuebe di e 11 grupo di producto a subi. E subida mas fuerte a wordo registra na berdura, cu den un solo luna a bira 2,2 porciento mas caro. Lechi y webo a subi fuerte tambe cu 1,0 porciento, mientras fruta (0,7 porciento), bebida sin alcohol (0,5 porciento) y sucu y cosnan dushi (0,5 porciento) tambe a bira mas caro. E unico caida claro di prijs a wordo observa na papa y otro tuberculo, cu un caida di 1,2 porciento. Come pafo di cas, cu ta inclui restaurante y cuminda pa hiba, tambe a bira mas caro. E categoria aki a mustra den november un subida di prijs di 0,3 porciento. Esaki ta nifica cu tanto casnan cu ta cushina na cas como hende cu ta depende di comida pafo di cas ta confronta cu costo mas halto.

EFECTO ASCENDENTE

Hunto, cuminda y servicio di catering a causa un efecto ascendente riba e indice di prijs pa consumidor. E subida di prijsnan den e grupo aki a compensa un parti di e caidanan den energia y otro producto. Segun CBS, prijsnan di cuminda so mes a contribui visiblemente na inflacion den november, apesar di e caida general ligero di prijsnan. Riba base anual, cuminda ta keda un gasto importante. Den e ultimo diesdos luna, Food & catering services a subi cu 1,5 porciento. Specialmente sucu, bebida, azeta y grasa y fruta a bira structuralmente mas caro. Esaki tin consecuencia directo pa e minimo di biba, pasobra cuminda tin un peso grandi den gasto di casnan, specialmente pa ingreso abou. E cifranan ta laga claro cu, apesar di combustible y energia mas barato, mercancia diario y comida ta sigui pone mas presion riba presupuesto di cas. Pa famianan y persona su so cu ingreso limita, esaki ta nifica cu un parti grandi di cualkier alivio otro banda ta wordo inmediatamente caba pa costo mas halto pa come y bebe.