ICAO ta adverti tocante interupcion di GPS riba region zuid di Caribe

WILLEMSTAD - Den e espacio aereo cu ta wordo administra pa Corsou, y tambe den esun di Venezuela, ta ocuri interupcion cada biaha mas den navigacion di satelite manera GPS. Esaki ta resulta for di un Safety Issue Alert di e organizacion internacional di seguridad aereo RASG-PA, cu ta cai bou di International Civil Aviation Organization (ICAO). E advertencia ta bini den un momento cu e tensionnan entre Merca y Venezuela a subi, y segun The New York Times tin interferencia deliberadamente cu señalnan di GPS for di tur dos pais. Segun e advertencia di ICAO, companianan aereo y control di trafico aereo den varios asina yama Flight Information Regions, entre nan esun di Corsou, ta raporta un aumento den cantidad di caso cu señalnan di GPS ta cay temporalmente. Pilotonan ta mira indicacionnan manera perdida di informacion di posicion of reduccion den capacidad di navegacion. Den algun caso tambe señalnan di ADS-B of transponder ta cay, cu ta hasi avionnan wordo temporalmente menos visible pa control di trafico aereo. E interferencianan generalmente ta dura algun segundo te minutonan y ta ocuri principalmente na altura di crucero, tanto durante buelonan di ruta como den cercania di aeropuertonan. No tin accidente raporta, pero ICAO ta papia di un “riesgo di seguridad cu ta surgi” debido na e frecuencia y e distribucion geografico di e raportanan.

GUERA ELECTRONICO

ICAO no ta menciona ningun causa concreto den e documento. Sin embargo, The New York Times ta apunta riba un contexto geopolitico mas amplio. Segun e diario, tanto Merca como Venezuela ta perturba señalnan di GPS deliberadamente den region Caribeño pa proteha blanco militar contra drone y arma di precision. E medidanan electronico aki ta destina pa preveni atake, pero sin ke ta afecta tambe trafico aereo civil. Segun datonan cita door di e diario for di institucionnan di investigacion, desde september un parti significante di buelonan den region a experencia problema cu GPS. Pasobra señalnan di satelite no ta keda para na frontera di pais, interferencia rond di instalacionnan militar of barco di marina por tambe tin efecto riba corredoronan aereo civil cu hopi trafico.

MAS ATENCION

ICAO ta pidi companianan aereo, pilotonan y control di trafico aereo pa tuma mas atencion. Companianan mester verifica advertencianan actual antes di salida y sigura cu sistema di navegacion alternativo, manera ILS y VOR/DME, ta disponible. Pilotonan ta wordo pidi pa raporta storionan immediatamente y pa entrega raportahe detaya despues, pa asina por traha patronnan mas claro. Pa Corsou, e advertencia ta nifica cu e preocupacionnan reciente tocante casi-incidentenan den e espacio aereo no ta separa for di e tensionnan internacional den region. Banda di trafico militar intenso, interferencia electronico di sistema di navegacion ta hunga un rolnan cada biaha mas grandi den seguridad di trafico aereo civil.