Minister Gerlien Croes a haya un di dos ultimatum di MEP pa presenta prueba

ORANJESTAD  - Minister Gerlien Croes a haya un di dos ultimatum di MEP pa presenta prueba, cu e mes a paga pa e avion priva cu cual e la bula bay Corsou recientemente. Di dos, pasobra recientemente caba, MEP a pone un ultimatum di 2 siman. Esey a vence, y e ora MEP a bay investiga kico ta nan siguiente paso, pero no a entrega keho e ora ey, aunke esey ta loke nan lo a bay haci. Segun e partido geel, democracia ta funciona riba un principio basico: confiansa entre Parlamento y Gobierno. “Sin e berdad, no tin control. Sin control, no tin democracia”. Ademas, segun e partido, un minister tin obligacion constitucional y moral pa duna informacion correcto, completo y honesto na Parlamento y si un error a wordo cometi, corrigi esaki immediatamente. Y nan ta sugeri cu e minister di a gaña, bisando cu oa un minister gaña Parlamento, no ta trata di un error chikito. “ Esaki ta un violacion grave di responsabilidad ministerial, un falta di respet pa Parlamento y un daño serio na confianza di pueblo den gobierno” e partido geel ta sigui bisa. “Nos no por, ni mag, normalisa cu un minister ta gaña, no ta asumi responsabilidad y simplemente sigui den funcion. Esaki no ta aceptabel, no na Aruba, y den ningun democracia serio. “ Pesey nos a duna e minister 36 ora pa presenta e pruebanan na ken el’a paga, ki dia el’a paga y cuanto el’a paga. Si e minister no cumpli, e mester atene su mes na e consecuencianan” lider di fraccion di MEP a finalisa su discurso.