KLM ta ahusta medida di seguridad pa bula den espacio aereo di Corsou

SCHIPHOL - KLM ta tuma medida di seguridad extra pa buelonan di y pa Corsou, pa motibo di e casi-incidentenan entre avion civil y militar di e dianan pasa. Asina e portal di noticia hulandes NOS ta raporta E compania aereo a ahusta su medida interno di seguridad y ta obliga avionnan pa ta lo mas visible posible ora nan ta bula den e espacio aereo di Corsou.

Den e dianan pasa, pilotonan di un buelo di pasahero di JetBlue y di un avion priva a raporta cu nan a pasa hopi cerca di avionnan militar mericano. E incidentenan aki a pasa den un contexto di aumento di actividad militar Mericano den e region, dirigí contra Venezuela. Pa e trafico militar aki ya tabata adverti anteriormente den mensahenan oficial di aviacion.

ILUMINACION EXTRA

KLM ta obliga su avionnan pa usa iluminacion extra no solamente durante subida y descenso, incluyendo luznan di logo y posicion, pero durante henter e tempo cu nan ta bula den e espacio aereo di Corsou. Cu esaki, e compania kier aumenta e visibilidad di e avionnan y reduci e riesgo di malentendimentonan den un espacio aereo cu trafico militar y civil ta intenso.

E medida mas estricto ta sigui despues di un reunion urgente entre, entre otro, e autoridad di aviacion Mericano FAA, e control di trafico aereo di Corsou, e organizacion internacional di aviacion ICAO, e organizacion di sector IATA y diferente companianan aereo. Durante e reunion aki nan a discuti e confiabilidad di sistema di radar y deteccion, specialmente na distancia mas largo for di Corsou, y e necesidad pa un coordinacion mas mihor cu e trafico militar Mericano.

Anteriormente KLM a declara cu e lo sigui monitoria e desaroyonan den e espacio aereo Caribe cu hopi atencion y cu no ta exclui mas medida adicional si e circumstancianan duna motibo pa esaki.