Corsou ta cera 2025 cu surplus di 238 miyon florin

WILLEMSTAD - Den su reakshon riba e di tres reportahe di ehekushon (“Uitvoeringsrapportage”) di presupuesto 2025 di pais, Kolegio Supervishon Finansiero (Cft) a indiká ku Kòrsou tin un surplus di 238 mion. Esaki ta nifiká ku den e promé tres kuartalnan di 2025 gobièrnu a haña mas entrada kompará ku loke a pronostiká. Pero si tira un bista mas aleu riba kiko di spera den e último kuarta di 2025 por konkluí ku e 238 mion florin aki tin nòmber i fam kaba, manera ta keda bisá na bon papiamentu.

Durante di tratamentu di presupuesto supletorio 2025 den Parlamento, kaminda gobièrnu a proponé kambio den e presupuesto di 2025 i ku ya parlamento a aprobá, minister di Finansa Charles Cooper a indiká ku gobièrnu ta kontentu ku e resultado di e di tres reportahe di ehekushon pa loke ta finansa di Kòrsou.

Den mesun rosea Cooper a indiká ku di e 238 mion florin na surplus, tin sigur 160 mion florin fakturá kaba, esta tin 160 mion florin na kompromiso finansiero ku gobièrnu a hasi i ku mester paga. Tambe mester tene kuenta ku un 70 mion florin adishonal ku mester di dje entre  yanüari pa mart 2026 pa kaba atendé gastunan di aña 2025. Pues di e 238 mion aki tin 230 mion reservá pa kaba di paga gastunan di gobièrnu pa 2025.

E surplus real pa 2025 ta kalkulá di ta realmente alrededor di 8 mion florin. Esaki ta nifiká ku situashon finansiero di pais ta keda bou di un preshon. Esaki Cft tambe ta keda konkluí den su reakshon riba e di tres reportahe di ehekushon. For di e deklarashon di minister Cooper den Parlamento por tuma nota ku e surplus di 238 mion no ta un sèn èkstra ku por hasi uso di dje pa por ehèmpel pone mas fondo disponibel pa enseñansa òf indeksashon di AOV (penshun di behes) pa penshonadonan.

Indeksashon di AOV ta un diskushon fuerte den komunidat último dianan. Penshonadonan ta pendiente pa tende awe djaluna 15 di desèmber riba indeksashon di e penshun di behes konforme e lei di AOV. UPAH huntu ku otro organisashonnan di penshonado APT, MPK i APKK ta forma parti di e union di penshonadonan. Nan ta risibí sosten di sentralnan sindikal SSK, CGTC i SSS.

Gobièrnu a pidi Banko Sentral, Kolegio di Supervishon Finansiero i Departamento di Legislashon i Asuntunan Hurídiko konseho riba proposishon di e union di sindikatonan. NOTA: Texto ta scirbi den papiamento fonetico di Corsou.