DC-ANSP: Problema electrico a strobe servicio di controlador di trafico aereo dialuna pa Corsou

WILLEMSTAD - DC-ANSP, e proveedor oficial di servicio di trafico aereo pa Corsou, a duna informacion ayera tocante un incidente cu a sosode dialuna. Door di un fayo electrico, anochi por un rato no tabatin servicio di controlador di trafico aereo disponible pa e espacio aereo unda Corsou ta responsabel. Segun un comunicado di prensa, un sistema automatico di siguridad anti-fuego a activa inmediato y bombero a hasi un inspeccion preventivo. Tur señal ta mustra cu tabata un problema electrico. No tabatin candela y seguridad di personal ni di e facilidad no tabata den peliger na ningun momento.

Pa por evalua e situacion cu cuidou y resolve e desperfecto electrico, servicio a wordo suspende temporalmente segun regla internacional di seguridad. Durante e periodo ey, trafico aereo cu tabata pasa riba, a wordo desvia manera sigur den combersacion cu organisacionnan vecino di controlador di trafico aereo y ICAO. E servicio riba torenan di Curaçao International Airport y Bonaire International Airport a keda disponible, cu ta haci cu salida y aterisahe a continua manera sigur segun e regla.

E servicio completo a bolbe na normalidad pa nueb’or y mei di anochi ora, despues cu ekiponan y e area operacional a wordo libera pa uso. DC-ANSP ta haci un assessment pa sigui investiga cu kico a causa e interrupcion.