Preocupacion den Tweede Kamer durante debate tocante Venezuela

DEN HAAG - Den Tweede Kamer tin gran preocupacion tocante seguridad di Aruba, Bonaire y Corsou awor cu tension rond Venezuela ta subiendo. E islanan ABC ta so cu algun docena di kilometro for di costa Venezolano. Esey a keda trata diamars anochi durante un debate di e comision di Reino di Tweede Kamer.  Tin preocupacion tocante violencia di Merca, inestabilidad den region y e riesgo cu e conflicto por bira mas grandi, cu tur consecuencia ey pa e islanan. “Esaki no ta un cos leu for nos cas , esaki ta na porta di nos Reino”, segun miembro di Tweede Kamer di BBB, Vermeer. Segun minister di Relaciones Exterior Van Weel (VVD) no tin ningun peliger inmediato pa e islanan, pero e gobierno ta sigui e situacion di cerca cu contacto frecuente cu autoridadnan local. Tambe nan ta consulta cu otro paisnan pa mira con por actua hunto si tension ta escala. Como precaucion, e barco marino Hulandes Zr. Ms. Den Helder a bai for di Merca pa Caribe, segun Van Weel. Esaki por yuda den abastecimiento si necesario. Pa awor no tin razon pa panico, segun Van Weel, pero e lo “disponibel dia y nochi” si tin pregunta for di e islanan, “y mi ta serio”. Varios partido manera GroenLinks-Pvda, D66 y Denk ta bisa cu ta trata di violacion di derecho internacional.

‘NO TIN INFORMACION DI MERCA’

Trump a duna lider venezolano Maduro un deadline pa sali for poder, cu segun noticia a pasa caba. Tambe miembronan di Tweede Kamer ta critica e regimen di Maduro cu ta suprimi protesta duro. Segun cifranan di Naciones Uni, den 10 aña pasa casi 8 miyon Venezolanonan a huy for di pais. Pero segun Van Baarle di partido Denk, e mal regimen no ta razon pa Hulanda pa bira parti di e “politica neocolonial motiva pa recurso natural” cu Merca ta sigui awor. E y otro miembronan di Tweede Kamer ta critica e atake contra speedbotonan cu hopi victima. Miembronan di Tweede Kamer kier sa kixo informacion e gobierno Hulandes tin tocante accion di Merca y nan declaracionnan tocante contrabando di droga cu nan ta uza pa justifica atake. Van Weel a bisa cu e ta comprende e pregunta, pero e no tin informacion. Asina no por verifica si tin o no violacion di derecho internacional. “Nos no sa exacto e intenshon di Merca.”

PROBLEMATICO

Piri di GroenLinks-Pvda a bisa cu e falta di condenacion di violencia ta “problematico”. “Naturalmente mester investiga tur cos, y mi ta asumi cu esey ta pasa”, segun Van Weel, pero esaki “ta e prome paso di proceso”. Van Weel a enfatiza cu Hulanda “definitivamente no kier bira parti di operacion di Merca.”