Caribbean Arthritis Foundation a felicita reumatologo Nurmohamed cu su condecoracion real  

AMSTERDAM/ORANJESTAD – Profesor Mike Nurmohamed, un reumatologo respeta y dedica na Reade desde 1997 y alavez un profesor universitario na Amsterdam UMC desde 2015, recientemente a tene su discurso di despedida den e auditorium di Amsterdam UMC. Durante di su discurso e la tene un simposio riba e maneho di riesgo cardiovascular cu ta presente den pashentnan cu ta sufri di artritis reumatoide reflehando bek riba su carera profesional y su logronan cientifico y academico. 

Caribbean Arthritis Foundation, bou liderazgo di Presidente Francisco de Mey, un fundacion activo riba tereno di congresonan medico y actividad di pashent, a wordo representa pa secretario Edbert (Ebby) Schwengle, cu ta tin e grato honor pa ta presente durante di e discurso di despedida di Profesor dr. Mike Nurmohamed. E discurso a yega su punto culminante na momento cu e acalde di e municipio Wijdemeren, Sr. Mark Verheijen, a sorprende tur presente cu un mensahe di su Mahestad Rey Willem Alexander cu Prof. dr. Mike Nurmohamed a wordo condecora cu e titulo “Ridder in de Orde van de Nederlandse Leeuw” pa su contribucion excepcional na e mundo di reumatologia y alavez e communidad academico. 

Miembro di e hunta di supervision di Reade, Sra Lonneke de Lau ta añadi cu Profesor Mike Nurmohamed como reumatologo a yuda hopi personanan cu un malesa atritico, semper cu un bista pa e perspectiva humano y cu atencion pa tuma decisionnan conhuntamente. Su impacto riba e cuido medico di awendia y pa futuro ta considerable y su dedicacion riba e tereno academico y scientifico ta di gran balor pa e futuro pa reumatologia na Hulanda. 

Caribbean Arthritis Foundation ta un fundacion voluntario cu a ser funda na 2015 cu a duna su aporte humilde na e yegada di Aruba su prome reumatologo na 2019 despues sigui pa congresonan medico, actividad di pashent, tur esaki cu aporte di Sra. Gerardine Willemsen-de Mey, presidente di Nationale Vereniging Reumazorg Nederland. Durante 2022 y 2024 profesor Mike Nurmohamed tawata orador na e congresonan medico organisa pa Caribbean Arthritis Foundation. E enfoca tawata y lo keda pa consientisa e veld di cuido riba diagnostico tempran pa asina mehora e calidad di bida di tur pashent atritico aki na Aruba cu su lemanan: “Improving lives” y “A commitment to healing”. Caribbean Arthritis Foundation ta sostene e obhetivo pa un desaroyo sostenibel di Nacion Uni, es ta: (3) salud y bienestar, (10) reduce desigualdad (17) aliansanan pa logra metanan. Un felicitation special y alavez un agradecimento ta bai pa Profesor Mike Nurmohamed cu a toca e curason di hopi pashent, tambe aki na Aruba.