Aruba a ricibi mas cu 7 miyon euro di fondo EU

ORANJESTAD – Aruba a ricibi mas cu 7,2 miyon euro di subsidio for di programa di Union Europeo durante e periodo 2021 te 2024. E placa aki a keda dividi entre cerca 65 proyecto, cu mas o menos binti organisacion  ta participa. Esaki ta sali den un reporte tocante participacion di pais y teritorio den ultramar den e programa di subsidio europeo.

Un parti importante di e apoyo europeo pa Aruba ta bin di programa pa educacion y hoben Erasmus+. Na marco di e programa akí, Aruba a ricibi mas cu 1,1 miyon euro pa casi cincuenta proyecto. Ademas, via European Solidarity Corps Aruba a haya casi 1,15 miyon euro pa proyecto di volontario y desaroyo di hoben.

Un punto interesante ta cu Aruba, diferente cu hopi otro islanan, tambe a beneficia di financiamiento grandi pa infrastructura. Via Connecting Europe Facility, Aruba a ricibi cerca 4 miyon euro pa un proyecto di infrastructura. Ademas Aruba a haya mas cu 640.000 euro via e programa Digital Europa y mas cu 430.000 euro for di programa di investigacion Horizon Europa.

Compara cu otro pais y teritorio den ultramar, Aruba ta conta manera un di e receptornan mas grandi den region Caribe. Solamente Groenlandia y Polinesia Franses a haya mas fondo europeo den mes periodo ey, sobretodo pa proyecto grandi na energia, infrastructura y medio ambiente.

Na nivel general di tur LGO (pais y teritorio den ultramar) e reporte ta mustra un cresemento fuerte. Entre 2021 y 2024, rond 52 miyon euro di subsidio europeo a ser otorga, contra rond 11 miyon euro den e periodo prome. Aruba ta tene un posicion relativamente fuerte, tanto pa e cantidad di fondo cu a haya, como pa e variedad grandi di area cubri: educacion, hoben, digitalisacion, investigacion y infrastructura.