FIU ta congela transaccionnan bancario riba peticion di OM pa labamento di placa

ORANJESTAD - Financial Intelligence Unit (FIU) di Aruba den 2024 a manda blokea transaccionnan bancario despues cu Ministerio Publico a pidi esaki. E informacion ta sali cla den e raport anual di e dependencia. E medida ta hopi raro, pasobra para transaccionnan bancario ta un facultad cu casi no ta usual. E medida a tuma lugar den un investigacion relaciona cu trade-based money laundering (TBML). Den esaki ta usa fluhonan di mercancia y factura pa haci labamento di placa. Segun FIU, un investigacion estrategico anterior (2023) a yega na un analisis operacional unda nan a haya di nobo fluhonan di placa sospechoso. Riba base di esaki, varios Financial Intelligence Reports a wordo comparti cu polis y husticia. Den mesun investigacion tabatin peticion di informacion na FIUnan extranhero. Despues di esaki, Aruba a haya informacion  financiero adicional pa por traha rastreo di propiedad y pa asegura posibel ganancia criminal. FIU ta bisa cu esaki a resulta den un peticion formal di Ministerio Publico pa congela transaccionnan.

CONVENCION WARSAW

Para fluhonan di placa ta un competencia cu ta bini for di obligacionnan internacional bou di e Convencion Warsaw. Esaki ta duna FIUnan facultad pa tene transaccionnan temporariamente ora tin un sospecha di labamento di placa, fraude of otro delito serio. Segun FIU, e medida ta enfatisa importancia di informacion financiero den investigacionnan contra criminalidad organiza. Den e dossier TBML, FIU a traha intensamente hunto cu Ministerio Publico y organizacionnan extranhero pa haya bista riba fluhonan di placa sconde y structuranan transfronterizo.