Venezuela ta menaza liñanan aereonan cu lo kita nan permiso di bula

CARACAS – Venezuela ta exigi cu liñanan aereonan internacional tin 48 ora pa bolbe cuminza bula pa e pais. Si nan no haci esey, nan ta risca perde e permiso di bula. Instituto di aviacion Venezuelano a bisa esey dialuna. Varios liña aereo a dicidi di anula nan buelo despues cu autoridad aereo Mericano FAA a adverti diabierna di pasa pa un situacion posibelmente peligroso riba Venezuela. E advertencia a bin despues di un movimiento militar Mericano den region Caribe y atake riba boto cu segun Merca ta involucra den trafico di droga. Segun International Air Transport Association (IATA) , cu ta representa mas o menos 350 linea aereo, e amenaza di Venezuela ta limita conexion internacional di e pais mas profundo. E organisacion ta duna critica fuerte riba presihon cu Venezuela ta pone. Entre otro, TAP di Portugal, Avianca di Colombia, Iberia di España y Gol di Brasil a anula buelo e fin di siman pasa. Air Europa y Plus Ultra tambe e dialuna a comunica cu nan ta scrap nan buelo.