Minister Gerlien Croes ta representa Aruba durante International Sports Conference na Corsou

ORANJESTAD   – Den su rol como Minister di Deporte di Aruba, Minister Gerlien Croes, a hiba discurso durante e apertura awemainta den e International Sports Conference cu ta tumando luga e siman aki na Corsou.

E conferencia, organisa pa FDDK, ta reuni experto, politico, organisacion di deporte y partnernan regional pa trata temanan importante manera futuro di politica di deporte, inclusion, desaroyo deportivo y e rol cu deporte tin den progreso social. E programa ta inclui keynote speakers, sesionnan interactivo, panel discussions y presentacionnan di profesional deportivo for di region y internacional. 

Durante e conferencia lo wordo trata temanan manera importancia di innovacion den deporte, turismo deportivo, politica deportivo innovativo, desaroyo di talento, infrastructura deportivo y e impacto di deporte den crecemento economico. E inclusividad di datos den deporte tambe ta di importancia, pa defini maneho den deporte y potencial pa innovacion den deporte. Minister Gerlien Croes tambe lo tene reunionnan bilateral cu partnernan regional, federacionnan di deporte y organisacionnan di desaroyo.

E International Sports Conference ta representa un oportunidad importante pa presenta Aruba su vision y ambicionnan den area di deporte, y pa fortalece colaboracionnan nobo na nivel internacional.