Corsou ta conoce dos morto den un accidente di trafico

WILLEMSTAD - Tabata ayera, algu pasá di mitar di ocho di anochi, ku Sentral di Polis ta keda notifiká ku lo tin un aksidente di tráfiko serio a tuma lugá na altura di Landhuis Bloemhof riba Sta. Rosaweg. Na yegada di e patruya por a tuma nota di e seriedat, tumando na konsiderashon ku e vehíkulo embolbí den e aksidente tabata di destruí tal forma ku for di e momentu ei tabata teme pa bida di e okupantenan.

A yama ambulans i kuerpo di reskate ku e urgensia nesesario pa wak kon por saka e okupantenan for di e situashon  ku nan tabata den i asina trata pa salba nan bida. Pero tabata bisto ku no por a hasi nada mas pa e okupantenan debí na e situashon ku nan tabata aden.

Konforme e komunikado di polis t’asina ku for di investigashon preliminar a sali na kla, ku shofùr di e vehíkulo ku tabata kore riba Sta. Rosaweg direkshon Schottegatweg-Oost, pa un motibu òf otro a pèrdè kontròl riba su stür i a dal kontra di un palu di mata.

Ambulans a yega rápido na e sitio i nan a tuma nota ku den e vehíkulo tabatin un hòmber shofùr i un dama okupante, di kua ámbos no tabata duna señal di bida.

Dòkter di polis a konstatá morto di e okupantenan di e outo di famia. Personal di Departamentu di Tráfiko ta enkargá ku e investigashon. NOTA: E texto ta scirbi den papiamento fonetico di Corsou.