Gobierno ta firma contract cu Schiphol Group, pero sin garantia pa un local na cabez

ORANJESTAD – Gobierno di Aruba a anuncia dialuna cu nan ta den keda cla pa firma un contracto nobo cu Royal Schiphol Group (RSG), y cu esaki lo tuma lugar probablemente den luna di December awor. Debi cu tabatin varios rumor ta circula, a dicidi di bin afo cu informacion, for di ‘the horses mouth’, pa asina elimina cierto rumornan. Pero e contract no ta sigura varios punto cu ta wordo considera importante si. Un cos ta sigur, cu e suma cu e CEO cu bin, ta bira uno cuantioso, miyonario, aunke cu segun e gobierno, e ta sigur menos di cualkier otro CEO cu tabata na cabez di aeropuerto. A menciona un suma di por lo menos 700 mil florin menos cu e CEO anterior. Noticiacla a compronde cu anteriormente a menciona suma di por lo menos 4 miyon pa aña, cu a keda ‘reduci ‘te na’ 1 miyon y pico. Pero e minister encarga, Wendrick Cicilia a bisa rapidamente cu e suma ta exclui cu ta kita varios gastonan social afo. 

KICO TA KEDA AFO

No ta tanto kico ta aden, sino mas bien kico ta keda afo di e contract ta loke ta hala atencion. Manera e deseo mas principal pa e gobierno, cu kier pa Schiphol Group pone un Arubiano na cabez. Pa awor, e intencion ta, pa pone un director statutario banda di e CEO. Tambe ta e ‘intencion’ pa RSG provee entrenamento na Aruba pa no solamente e personal local sino tambe pa otro aeropuertonan den region. Y segun prome minister Mike Eman, esaki lo por cuminsa for di otro aña caba. Pues, na fin di dia, lo firma un contracto, unda cu RSG ta haya su gana, esta cu e ta haya un CEO cu un salario cu ta conforme e rekisito pa tin talento di nivel halto. Pero no cu un local, ta garantisa di keda apunta. 

KICO MESTER PA HAYA UN LOCALManera cu e actual director interino James Fazio a bisa Noticiacla caba, prome minister Mike Eman a ripiti esaki awe tambe. No ta cu RSG no kier nombra of apunta un hende. Pero e persona aki, mester por ta disponible pa bay afo, prepara su mes den exterior, bin bek y cu e experiencia adkeri, bira e CEO. Fazio tabata hopi enfatico den su declaracion pa e portal aki, unda cu a bisa cu RSG no ta promove for di paden, pero ta busca talento for di afor, cu ta sigura y garantisa experiencia nobo cu ta necesario pa maneha un aeropuerto.