Barco di marina Zr.Ms. Pelikaan un biaha mas ta brinda yudansa di emergencia na Jamaica

ORANJESTAD - Directamente despues di entrega cu exito e prome carga di suministro di emergencia, Zr.Ms. Pelikaan un biaha mas ta na caminda pa Jamaica pa brinda yudansa di emergencia.

Directamente despues di entrega di e mercancia di yudansa y e material di emergencia na Jamaica diamars 4 di november, mes dia ei e barco a sali bek den direccion di Barbados pa un carga nobo di mercancia. Diasabra ultimo pa di dos biaha e barco a keda carga cu suministro  di yudansa y materialnan di emergencia. E barco di Marina Hulandes awe 12 di november lo yega Jamaicaden transcurso di dia.

Zr.Ms. Pelikaan e biaha aki tambe a keda yena cu mercancia esensial di yudansa, manera vehiculonan, tent di emergencia y mercancianan di emergencia. E conteinernan tambe a keda yena cu un average di 150000 bleki di cuminda y miles di artikulonan di necesidad basico, manera luz cu ta funciona riba energia solar, jug y generator. Durante e prome suministro di materialnan di yudansa na Jamaica, Zr.Ms. Pelikaan a hiba entre otro un instalacion di desalinisacion pa traha awa di bebe, ademas di 1440 rason di emergencia, 1000 kit di refugio, 1200 tent di emergencia y 1400 cama di campamento pa Jamaica.

Zr.Ms. Pelikaan ta equipa cu un kran y un bodega di carga grandi. Esaki ta haci e barco di sosten logistico idealmente adecua pa e tarea di alivio. Duna asistencia ta un di e tres tareanan principal di Departamento di Defensa den Region Caribe.