Conocido locutor, comerciante y periodista deportivo Manuel da Silva a bay sosega

ORANJESTAD – Despues di un enfermedad cortico, conocido colega den prensa, principalmente den e mundo di deporte di auto di careda, y comerciante propietario di e bar na Madiki, Manuelito’s, Manuel Da Silva a bay sosega diasabra. E tabatin varios dia ta lucha intensamente den hospital, y a haci tur loke tabata por a haci. Diabierna anochi ainda, e la ricibi un mensahe di sosten di Noticiacla. Pero ya diasabra durante dia, e noticia a bira conoci cu Manuel a bay sosega. Un colega hopi aprecia, unico den su estilo, tanto den locuta, transmit y crea ambiente. Pa hopi aña, Manuel a bira e cara di un evento popular cu tabata conoci como Hebbe Hebbe.  Y despues a cambia di nomber. Te na ultimo, Manuel tabata presenta su programa Trot den Bom na e emisora Power FM, tur diaranson atardi. Na September ainda, Noticiacla tabata invitado di e programa. Noticiacla ta manda palabra di profundo condolencia na famia di Manuel, especialmente su yiu muhe Shohaira y demas famia. Cu amigo Manuel, sosega na paz.