Na Corsou segun FKP mitar di esnan cu ta huur cas, no ta paga

WILLEMSTAD.– Un di e disputonan cu ta bin hopi dilanti den corte pa tratamento, ta disputa relaciona cu mal pagadornan di huur di caso. Pago di huur di caso aki na Corsou ta un problema serio. Hopi hende ta huur un caso sea di sector priva of di Fundacion Cas Popular (FKP), pero no ta paga, i e loke ta haci e situacion mas dificil ta cu tin ley cu ta proteha e grupo aki, cu ta haci dificil pa desaloha un mal pagador. Un di e entidadnan cu ta keda perhudica seriamente ta FKP. Durante tratamento di un disputa di cobransa di huur atrasa, a sali cla kico ta e dolor di FKP.

FKP tin 5.000 caso den huur, mientras nan tin 8.000 hende riba lista di espera. Di e cinco mil hende cu tin un caso den huur, mitar no ta paga manera mester ta.

Pa falta di capacidad di e huurdo, ta pone cu gobierno debe FKP subsidio di huur, pero na mes momento ta indica cu gobierno tambe ta un mal pagador. E consecuencia ta cu e prijs di huur ta bira na proporshon mas abou. Despues cu desaloja un huurdo, e ta bolbe subi e lista di espera, e biaha aki te abou di lista di 8 mil hende den espera.

Den e raport di FKP relaciona cu atraso di huur, no tin inclui interes legal, prijs di huur no ta indexa, tampoco tin OB calcula. Un cos ta sigur: FKP tin un problema grando. Durante tratamento den caso di un huurdo, corte a busca un apertura rasonabel pa yega na un solucion. E tribunal a haci proposicionnan cu tur esnan presente tabata parse di por biba cu e.

E punto di discusion ta cua condicion of termino e obligacion di pago por keda aplica. Pasobra FKP, como institucion social, a permiti retrasonan cu a bira extremo i inkontrolabel. E desicion cu corte ke impone ta pone cu FKP ta teme pa efecto di presedente. Mester indica cu esaki ta netamente e intenshon di corte. E proposicion impone, ta pa FKP stipula un multa na tur esnan cu tin huur atrasa si nan no desaloja.

Manera menciona, tin aproximadamente mitar di e 5 mil huurdo nan cu no ta paga nan huur den un forma adecuado. Esaki ta requiere un acercamento serio i determina pa atende e grupo aki.

Corte ta di opinion cu si FKP no persisti pa desaloha e mal pagadornan, e ora ei por papia di “dweil cu cranchi habri.”

Ta inaceptabel cu 2.500 huurdo no ta paga bon, mientras 8.000 persona ta warda riba un caso pa huur. Finalmente, wes ta enfatisa cu ta injusto pa esnan cu ta haci nan esfuerzo pa paga nan huur i FKP no ta haci nada contra di esnan cu no ta paga.