Jetten: Resultado electoral historico pa D66, ta sinti gran responsabilidad

DEN HAAG - Awor cu segun un analisis di ANP, partido D66 no por wordo alcanza mas pa PVV, lider di D66, Rob Jetten, ta bisa cu esaki ta un “resultado historico”. Aunke e resultado di municipio Venray y e votadornan for di exterior ainda mester yega, Jetten ta bisa cu e tin confianza den e medio di prensa y ta hopi feliz cu e victoria. Na e mesun tempo, e ta sinti un gran responsabilidad pa e miyonan di votadornan cu a vota pa otro partinan, y e ta mira un gran necesidad pa forma un gabinete stabil pa tur hende.

E ta bai busca un verkenner cu no solamente ta mira pa D66 como e partido mas grandi, pero tambe ta capabel pa uni tur forza politico. E no a duna un nomber ainda, pero segun e, mester ta un persona cu por mira “tur interesnan”.

Riba pregunta tocante na ki banda e formacion mester move – banda drechi of mei mei – Jetten ta bisa cu segun e, e votadornan a duna un mensahe cla cu nan ke un cooperacion den centro. Un coalicion cu JA21 no ta su prome preferencia, segun e.

Riba pregunta tocante e preferencia di VVD pa move drechi y no cu GroenLinks-PvdA, Jetten a hasi un yama na lider di VVD, Dilan Yesilgoz, pa laga e resultado ‘colga un rato’. Segun Jetten, e tempo di exclui otro ta di pasado: “Awe nos tin un otro tipo di responsabilidad. E amplio centro politico mester sinti e obligacion pa cuminza traha.”