CBA: Placa cash ta keda importante na Aruba, apesar di subida di pago digital

ORANJESTAD – Placa cash ainda ta hunga un gran papel den pago diario na Aruba, aunke hopi habitantenan ta spera cu den e añanan cu ta bin nan lo usa cash menos frecuente. Esaki ta sali den e raport Confidence in Cash 2024, publica pa Banco Central di Aruba (CBA). For di e estudio ta sali cla cu e biyetenan di 25 y 100 florin ta e mas usa. Tambe e monedanan chikito, manera 1 y 5 florin, ta keda popular pa compra diario. E mayoria di hende ta prefera saca nan placa for di ATM di nan propio banco. Aunke placa cash ta ancra fuerte den bida diario, CBA ta mira un cambio. Mas cu 70 porciento di e hende encuesta ta spera cu den e siguiente 3 te 5 aña nan lo paga cash menos frecuente, principalmente pasobra pago electronico ta bira mas facil pa usa.

GRAN CONFIANZA, POCO CONTROL

Loke ta yama atencion ta cu Arubianonan tin hopi confianza den e balidez y calidad di biyetenan. E biyetenan cu ta sali for di ATM ta haya e puntuacion mas halto den investigacion di confianza. Pero, hopi habitantenan ta controla poco pa si e biyetenan ta berdadero. Casi mita no a check  biyete den e ultimo seis luna, y solamente un   parti chikito ta reconoce varios característicanan di seguridad, manera marca di awa o tinte cu cambia color. Segun CBA, esaki por trece risconan, aunque mas cu 70 porciento di e hende ta bisa cu nan nunca a mira un biyete falso.

CASH TA KEDA RELEVANTE

Apesar cu pago digital ta bira mas popular, mas cu 90 porciento di hende ta spera cu den cinco aña nan lo sigui usa  placa cash. CBA ta conclui cu placa cash lo keda un parti importante di economia Arubano, como medio di pago confiabel den situacionnan caminda pago digital no ta posibel. E raport ta enfatisa cu un sistema di pago hibrido – caminda pago digital y cash ta existi hunto – lo sigui e realidad pa un tempo mas na e isla.