Horcan Melissa por yega Jamaica como uno di categoria 5 diamars

MIAMI - Horcan Melissa a intensifica rapidamente diasabra mainta y awor ta un horcan di categoria 4 cu bientonan di 145 mph. E Centro Nacional di Horcan di Merca (NHC) ta spera cu e lo sigui fortifica te categoria 5, un horcan raro, prome cu e subi tera na Jamaica diamars mainta. E centro di e horcan ta localisa aproximadamente 115 miya sur di Kingston, Jamaica, y e tormenta ta move lentamente pa oeste na solamente 5 mph. NHC a bisa na diadomingo mainta cu tur hende den Jamaica mester “busca refugio awor.”   “Bientonan dañino y awacero fuerte awe y diamars lo causa inundacion y caida di tera catastrofico y mortal prome cu bientonan devastador yega dialuna anochi y diamars mainta,” segun e centro.  Awacero torrencial ta golpiendo parti di Haiti, y ta probabel cu condicionnan di tormenta tropical ta existi den Jamaica. Awacero fuerte lo dura algun dia, trece un impacto mortal y potencialmente catastrofico.  

Prome minister di Jamaica Andrew Holness a bisa:  “Mi ta pidi na tur Jamaiquinonan pa tuma e amenaza meteorologico aki serio. Tuma tur medida pa proteha bo mes.”  Jamaica ta parece e epicentro di e triple amenaza di Melissa: inundacion di awacero extremo, dañonan di biento y subida di laman. E horcan ta spera pa subi tera diamars mainta, pero awacero ta cay riba e isla ya for di diadomingo. Haiti tambe ta spera e amenaza fuerte di inundacion y caida di tera causa pa Melissa.  Segun Evan Thompson, director principal di e Servicio Meteorologico di Jamaica,  “Subida di laman lo ta principalmente na banda sur di e isla, especialmente na banda este di e centro, ora e tormenta ta  cerca e costa sur y ta cuminza haci impacto.”  

Tin aviso di horcan vigente pa Jamaica, caminda ta spera condicionnan di horcan pa diamars. Cuba tambe a emiti un aviso di horcan pa e provincia oriental di Granma, Santiago de Cuba, Guantanamo y Holguin. Haiti na banda sur ta bou di vigilancia di horcan y aviso di tormenta tropical. Aeropuertonan di Jamaica ta cerando.  E Norman Manley International Airport a cera despues di su ultimo buelo programa a yega 8 anochi (9 p.m. ET) diasabra, segun Daryl Vaz, ministro di transporte. Sangster International Airport tambe a cerá diahuebs, segun Vaz.  

PAKICO E PRONOSTICO DI MELISSA TA ASINA ALARMANTE?  

E no ta move. Ora un tormenta ta move hopi lentamente, e awacero ta sigui cay riba e mes lugar pa dia tras dia. E mes situacion a causa inundacion catastrofico den 2017 cu Horcan Harvey na Texas, y den 2019 cu Horcan Dorian den Bahamas y Carolina di Sur. Montañanan ta aumenta e riesgo di inundacion.  E tereno halto di Haiti, Jamaica y Republica Dominicana ta forza e aire subi y los mas humedad, manera un paña humido cu ta wordo troci. Esaki ta cambia e aire tropical humido den torrencial di awa bahando e sero — caida di tera ta casi garantisa. Calor di Laman Caribe ta profundo. E awa excepcionalmente cayente di Laman Caribe ta drenta hopi abou, evita cu awa frio subi y debilita e horcan. Melissa lo alimenta su forsa cu e energia profundo di e laman, subiendo e nivel di su intensidad potencial. E ultimo horcan fuerte cu a afecta Jamaica tabata Horcan Beryl den juli 2024.  E no a lanta na tera, pero e tabata pasa na banda sur di e isla manera un categoria 4, trece awacero y bientonan fuerte.