Na Corsou, Aqualectra a paga 136 mil florin na claim despues di blackout

WILLEMSTAD – Ayera den Parlamento, e direktor di Aqualectra, señora Neysa Isenia, a splica cuantu placa Aqualectra a paga den claim despues di e blackout cu a tuma lugar dia 27 di augustus ultimo. E a bisa cu ainda tin reclamacion ta drenta. Segun señora Isenia, te ayera diahuebs 23 di oktober, Aqualectra a ricibi 263 reclamacion. Di esey, 175 a wordo resolvi. E promesa ta pa e resto di reclamacion wordo trata den dos siman. Di e 175, falta solamente dos pa paga, mientras 173 reclamacion ja a paga kaba. Den total, Aqualectra a paga 136 mil florin den gasto di compensacion pa aparatonan electrico cu a wordo dañá durante e blackout di 27 di ougustus.  

Tambe tabatin 15 reclamacion cu a wordo rechasa. Den un di es 15, e persona a bende su aparato electrico afo, y consecuentemente Aqualectra no por a verifica e daño. Den dos caso, e motibo di daño di e aparato no tabata dor di blackout. Na resto di e kaso, ora Aqualectra a bay haci control, e aparatonan tabata funciona normal, segun señora Isenia. E a splica cu normalmente, den dos siman despues cu e cliente entrega su reclamacion, Aqualectra ta haci analisis y ta paga e compensacion. Un inspektor di Aqualectra tin cu bay na cas di cliente pa wak e aparatonan dañá. E a agrega cu inda tin reclamacion ta drenta relaciona cu e blackout di 27 di ougustus.  

Durante e blackout mas reciente, ora e sistema a start bek, e a haci den forma chikito y pa area mas limita pa garantisa un proceso seguro. E metodo aki a separa Corsou den area mas chikito pa por restablece energia mas rapido, y e sistema aki lo keda usa den futuro. Aqualectra ta semper prepara durante e temporada di horcan, revisando nan makinerianan. Mas aden, señora Isenia a bisa cu awor Aqualectra ta logra casi 50% di energia cu Corsou ta usa for di fuentenan di energia renovabel, principalmente di biento y solo. Tin plan pa inverti mas den energia solar. Pero e reto ta cu hopi negoshinan y casnan a instala panel solar propio, lo cu a cambia e patron di demanda. Anteriormente tabatin un peak di consumo durante dia, pero awor esey ta pasa mas den anochi, entons sin bateria un parke solar no ta yuda den e momentonan clave.  

E director tambe a splica cu nan ta traha riba un proyekto piloto cu ta combini energia di biento y solar, cu ta mustra cu Corsou ta cana dilanti den region. Tin plan pa amplia e parke solar tambe.   Isenia a menciona cu Aqualectra a pidi un subsidio di 70 miyon euro na Hulanda, pero a ricibi 63 miyon euro. Esey lo yuda pa acelera e invershonnan planifica y pa baha gasto di interes di e fiansa. E subsidio ta destina pa fortifica e red electrico, principalmente den banda bou, y pa e substationnan. Mas invershon den e red ta nifica mas estabilidad.  

Finalmente, e a bisa cu ta imposibel pa garantiza cu nunca lo tin blackout mas, pasobra Corsou ta un isla y semper por tin situacion inespera cu ta causa un blackout. E fluctuacion di bientu di e 27 di ougustus ultimo tabata un ehemplo; e baterianan a logra preveni blackout mas grandi.