Di director di aeropuerto pa pastor: Micheal Nicolaas ordena como pastor diadomingo awor

ORANJESTAD – Di director di aeropuerto pa pastor. Señor Micheal Nicolaas  ta wordo ordena diadomingo awor como sacerdote pa Aruba. E ordenacion sacerdotal ta tuma lugar diadomingo awor 5’or na Pro Catedral San Francisco, y ta keda administra pa Arzobispo di Trinidad & Tobago. 

PROME MISA

Dialuna anochi, lo sigui e prome misa presenta pa pastor Nicolas cu ta na Misa Birgen di Fatima pa 7on como un misa di gradicimento. 

DIRECTOR AEROPUERTO

Loke pa hopi, ta haci esaki interesante, ta cu prome cu sr Nicolaas a tuma e rumbo di dedica su mes 100% na religion, e tabata director di aeropuerto den añanan 70/80 na Aruba, y a maneha nos aeropuerto como un local capacita. For di e tempo ey caba si, e tabata hopi activo religiosamente. Despues e la bandona Aruba y a establece su mes den exterior. E la maneha varios aeropuerto internacionalmente manera Lima, Republica Dominicana, y tambe te hasta esun di Bonaire.