A presenta dos buki nobo den Papiamentu 'No ta nan falta' i 'E hazañanan di Linchi Sardinchi'

WILLEMSTAD  – E buki di cartoon (stripboek) ”Linchi Sardinchi i su hazañanan” ta konsistí di 52 cartoon: unu pa kada siman den un aña. 

Ken ta Linchi  Sardinchi? Sherline Wawoe, kariñosamente yamá Linchi, ta un Yu'i Korsou di 28 aña. Sherline ta supervisor na un kompania di importashon i eksportashon. E ta single i den su tempu liber e ta gusta hasi kos leuk ku su mihó amiga Zusje. Na kas nan ta yama Sherline Linchi i – manera semper ta e kaso na Kòrsou - na skol muchanan a dun’e e nòmber di kariño ‘Linchi Sardinchi'. I pa kolmo, e ta allergisch pa sardinchi!

Linchi Sardinchi ta simbolisá e Yu’i Kòrsou den su totalidat. Lesando i mirando e personahe Linchi Sardinchi den su bida kotidiano, ta mira kon un Yu’i Kòrsou komun i koriente ta biba su bida na su pais Kòrsou. Den su aventuranan por mira su kustumbernan i su kultura. Den su akshonnan ta mira su pasado reflehá.

Tin un aspekto interesante na un stripboek na Papiamentu. Para ketu na e hecho ku muchanan di hopi otro kultura ta kustumá di mira nan mes representá, tantu den buki regular komo den stripboek. E Yu’i Kòrsou sí no ta kustumá di mira su mes ilustrá den stripboek. I manera nan ta bisa: ”Representation Matters”. Pues den e stripboek di Linchi Sardinchi, e Yu’i Kòrsou de pura sepa ta debidamente representá!

Banda di tur esaki, e stripboek di Linchi Sardinchi ta brinda kada mucha (i spesialmente esnan ku difikultat di lesa, por ehèmpel pasobra nan tin difikultat di lesa (dyslexie) e oportunidat pa lesa den nan propio idioma, presentá den un forma kómiko i atraktivo.

A traha e stripboek aki ku 4 grupo meta na mente:

1.      Mucha ku dyslexie (manera e ilustradó di e buki aki)

2.      Mucha ku no ta topa hopi buki na Papiamentu 

3.      Tur hende ku ta gusta lesa stripboek i ku no a yega di tin un stripboek na Papiamentu

4.      Tur hende ku ke sa mas di e kustumbernan i kultura di e Yu’i Kòrsou; pues e kosnan ku ta hasi un Yu’i Kòrsou ègt un Yu’i Kòrsou

Disfrutá di bo stripboek na Papiamentu! NOTA: Texto ta scirbi den papiamento fonetico di Corsou.