CJ: Turistanan Canades ta yega na Aruba den grandi cantidad

ORANJESTAD - Turistanan for di Canada ta yega na Aruba den grandi cantidad actualmente. Segun dato nobo publica pa e Organisacion di Turismo Caribeño(CTO), Aruba a ricibi 41.754 bishitante for di Canada durante e prome mita di 2025. Asina e portal Caribbean Journal ta raporta. Esaki ta representa un aumento di 8.2 porciento compara cu mes periodo den 2024 — y ta uno di e tasa di crecimiento mas halto for di Canada pa cualkier destino caribeno e aña aki.

E crecimiento aki ta refleha un fortalecimento general di demanda di biaha for di Canada pa e region Caribeno, stimula pa un aumento den cantidad di buelonan y interes constante den solo di invierno. Combinacion di Aruba di un servicio aereo confiabel, clima cayente tur e aña y infraestructura turistico bien establece ta sigui haci di e isla uno di e destino mas popular pa vacacionistanan Canades.

Canada ya tin hopi tempo como un mercado fuerte pa Aruba — y e cifra nobo ta sugeri cu e demanda no ta baha.

E impulso aki ta wordo reforsa cu e aumento di vuelo di WestJet, cu a amplia su ruta Toronto–Aruba pa cinco vuelo pa siman durante e temporada di verano y a anuncia un aumento di capacidad di 33 porciento pa 2025. E programa amplia aki ta refleha un estrategia pa cubri e demanda creciente di Canada, specialmente durante e periodo di vacacion importante.

Inversion hotelero tambe ta sigui e ritmo di e aumento den vuelo. Propiedatnan nobo manera e Iberostar Aruba, cu pronto lo habri su puerta, ta atrai interes di turistanan Canades familiariza cu e marca for di otro destino di solo, mientras e corredor di resort establece di e isla ta sigui evolucionando cu nobo comodidadnan y renovacionnan.

Conhuntamente, mas vuelo y oferta hotelero fresco ta prepara e terreno pa un temporada di invierno fuerte, consolidando e posicion di Aruba como uno di e destino lider den Caribe pa turistanan Canades.

Esaki tambe ta un testimonio di e crecimiento general di Aruba, cu e destino popular di Caribe Hulandes ta experimentando crecimiento for di varios mercado mas aya di su base tradicional den Merca — inclui Latinoamerica.