Sologitarista Ace Frehley (74) di rockband KISS a fayece

LOS ANGELES - Ace Frehley, sologitarista di e rockband mericano KISS, a fayece na edad di 74 aña. Frehley a muri na presencia di su famia despues di un cay den su estudio di grabacion den september. Den un declaracion, su famia a bisa cu nan ta “totalmente desconsola y kibra”. “Nos ta aprecia e recuerdo mas bunita y su sonrisa”, segun e famia a indica. E gitarista principal original di e banda, cu su nomber real tabata Paul Daniel Frehley, tabata un di e cuater miembro original. E banda di hardrock KISS a wordo forma na principio di e añanan setenta pa cantante Paul Stanley, basgitarista Gene Simmons y drummer Peter Criss, completa cu Frehley. Criss a reacciona na plataforma X cu hopi tristeza riba e fayece di Frehley. “Mi ta sorprende! Mi amigo… mi ta stima bo”, e drummer a skibi. Frehley a wordo kita for di e formacion den 1982 pa motibo di uso excesivo di alcohol y droga. Na 1996 Frehley a bolbe den un serie di concierto di reunion cu tabata hopi exitoso, y despues el a sigui presentando regularmente cu e banda.