Hopi periodista a sali for di Pentagono despues di regla di medio mas estricto

WASHINGTON – Oficina a keda bashi, studio di televishon a keda desmantela, y pas di prensa a keda entrega. Ayer hopi periodista a sali masal for di Pentagono pasobra nan no ta di acuerdo cu e politica di medio nobo di Ministerio di Defensa di Merca. Segun e regla nobo cu minister Hegseth a introduci recientemente, medio a keda prohibi pa publica informacion cu no ta oficialmente libera pa ministerio. “Medionan acredita no por provoca crimen,” asina e minister a reacciona riba X. “Acceso na Pentagono ta un privilegio, no un derecho." Periodistanan mericano a manifesta fuertamente contra e limitacion aki di libertad di prensa. Nan a indica cu manera aki lo ta imposible pa nan pone na lus irregularidadnan. Pasobra hasta informacion cu no ta secreto ta cay bou di e regla, Pentagono por usa esaki pa para noticia cu no ta agradabel pa nan.

HASTA FOX NEWS TA CRITICO

Medionan tabata extrañamente uni den rechasamento: no solamente canalnan ABC, CNN y NBC, agensianan di noticia manera Reuters y AP y periodiconan manera The New York Times y The Washington Post, sino tambe medio conservador Newsmax y Fox News (antiguo patron di Hegseth) a rehusa firma. Como consecuencia di esaki, nan acreditacion a keda cancela y e periodistanan tabatin te ora 4 di atardi ayera pa sali for di e edificio. Hopi a keda te na ultimo momento y a sali demostrativamente den fila, hopi bia cu caha di trabou den man. “Esaki ta un dia tristo pa libertad di prensa,” asina e representante di Associated Press pa Pentagono a reacciona. “Nos ta preocupa tocante compromiso di Merca cu transparencia gubernamental, responsabilidad publico di Pentagono y libertad di expresion den general.” Un bosero di Pentagono a bisa cu e ministerio no tin intencion pa bira atras. “Nos ta sostene nos politica pasobra esaki ta e miho pa nos tropanan y pa seguridad di nos pais.”